మంగపేట మండలంలో సుడిగాలి కారణంగా చెట్లు నేలకూలి రాకపోకలకు అంతరాయం

మంగళవారం సాయంత్రం ములుగు జిల్లా మంగపేట మండలం కోమటపల్లి సమీపంలో బలమైన సుడిగాలి వీచింది. ఈ సుడిగాలి కారణంగా అటవీ ప్రాంతంలోని పెద్ద చెట్లు నేలకూలాయి. కోమటపల్లి-కాటారం రహదారిపై సుమారు 5 కిలోమీటర్ల మేర చెట్లు రోడ్డుపై పడిపోయాయి.

శాంతినగర్ సమీపంలో ప్రధాన రహదారిపై చెట్లు పడటంతో రాకపోకలకు అంతరాయం ఏర్పడింది. కమలాపురం నుండి కొత్తపేట వైపు సుడిగాలి వెళ్లినట్లు స్థానికులు చెబుతున్నారు. శాంతినగర్‌లోని గొత్తికోయ గూడాల వైపు సుడిగాలి వెళ్లకపోవడంతో ప్రాణ నష్టం తప్పినట్లు వారు ఊరట వ్యక్తం చేశారు.

డీఎఫ్ఓ వికాస్ మీనా స్పందిస్తూ, మంగపేట సౌత్ బీట్‌లోని 5వ కంపార్ట్మెంట్‌లో డంపిడి, గానుగా, ముస్తి, ఈపీ జాతులకు చెందిన 20 నుంచి 30 పెద్ద చెట్లు నేలకొరిగినట్లు తెలిపారు. నష్టం అంచనా కొనసాగుతోందని, అటవీ సిబ్బంది పూర్తి స్థాయి అంచనా వేస్తున్నట్లు చెప్పారు.

ఇదే ప్రాంతంలో 2024 ఆగస్టు 31న మేడారం సమీపంలో, ఈ ఏడాది ఏప్రిల్ 22న కమలాపురం-ఏటూరు నాగారం రోడ్డుపై కూడా ఇదే తరహా సుడిగాలులు సంభవించాయి. ఈ వరుస ఘటనలతో ములుగు జిల్లా ప్రజలు ఆందోళన చెందుతున్నారు. శాస్త్రవేత్తలు, అధికారులు ఈ విషయంపై ప్రత్యేక దృష్టి సారించాలని స్థానికులు కోరుతున్నారు.