NEET చర్చపై బీజేపీ కౌంటర్: రాహుల్ గాంధీపై సుధాంశు త్రివేది విమర్శలు

పార్లమెంట్‌లో NEET పేపర్ లీక్ అంశంపై చర్చకు విపక్షం డిమాండ్ చేస్తున్న నేపథ్యంలో బీజేపీ అధికార ప్రతినిధి సుధాంశు త్రివేది కాంగ్రెస్ నేత రాహుల్ గాంధీపై తీవ్ర విమర్శలు చేశారు. మంగళవారం మీడియా సమావేశంలో మాట్లాడిన ఆయన, విపక్షం బాధ్యతారహితంగా వ్యవహరిస్తోందని, కాంగ్రెస్, దాని మిత్రపక్షాలు చర్చ విషయంలో నిరంతరం నియమాలు మారుస్తున్నాయని ఆరోపించారు. "చర్చ కావాలని ముందు అంటారు, సర్కారు సిద్ధంగా ఉన్నామన్నాక నిర్దిష్ట నిబంధనల కిందే చర్చ జరగాలంటూ షరతులు పెడుతున్నారు. ఇది చర్చ నుంచి తప్పించుకోవడమే" అని త్రివేది వివరించారు. రాహుల్ గాంధీ చేస్తున్నది నాటకమేనని, ప్రజలు దీన్ని అర్థం చేసుకుంటారని ఆయన అన్నారు. NEET పేపర్ లీక్ వ్యవహారంపై కేంద్రం ఇప్పటికే దర్యాప్తుకు ఆదేశించింది. పార్లమెంట్ సమావేశాల్లో ఈ అంశంపై చర్చకు ప్రభుత్వం సిద్ధంగా ఉందని, అయితే కాంగ్రెస్ మాత్రం విధానపరమైన అడ్డంకులు సృష్టించి చర్చను బహిష్కరించే ప్రయత్నం చేస్తోందని త్రివేది ఆరోపించారు. "చర్చ నుంచి పారిపోకండి" అని ఆయన కాంగ్రెస్‌కు సూచించారు. నిబంధనలు, పద్ధతుల పేరుతో ప్రతిపక్షం ప్రజాస్వామ్య బాధ్యత నుంచి తప్పించుకోవడం సరికాదని బీజేపీ నేత స్పష్టం చేశారు.