ఎన్నికల్లో పోటీ చేయాలంటే పార్టీ పదవులు వదలాలి: BJPలో చర్చ

ఎన్నికల్లో పోటీ చేయాలనుకునే నేతలు పార్టీ సంస్థాగత పదవులను వదులుకోవాలని BJP రాష్ట్ర వ్యవహారాల ఇంచార్జ్ సునీల్ బన్సల్ అన్నారు. తెలంగాణ BJP కోర్ కమిటీ సమావేశంలో ముఖ్య అతిథిగా హాజరైన ఆయన ఈ వ్యాఖ్యలు చేశారు.

రాష్ట్రంలో త్వరలో MLC ఎన్నికలు జరగనున్నాయి. అభ్యర్థులపై అభిప్రాయ సేకరణ పూర్తయింది. ఈ నేపథ్యంలో కీలక నేతలతో సమావేశం నిర్వహించారు. ఢిల్లీ నుంచి వచ్చిన సునీల్ బన్సల్ ఈ సమావేశంలో పాల్గొన్నారు.

ప్రస్తుతం రాష్ట్ర సంస్థాగత కమిటీలో ప్రధాన కార్యదర్శులు, కార్యదర్శులు, అధికార ప్రతినిధులుగా ఉన్న పలువురు MLC టికెట్ ఆశావహుల జాబితాలో ఉన్నారు. పార్టీ పదవి ఉంటే టికెట్ రావడం సులభమవుతుందని వారు భావించారు. బన్సల్ వ్యాఖ్యలతో ఈ అంశం పార్టీలో ప్రధాన చర్చగా మారింది.

ఒకే వ్యక్తికి రెండు బాధ్యతలు ఇస్తే ఒకదానికి న్యాయం చేస్తే మరోదానికి ఇబ్బంది అవుతుందని పార్టీ భావిస్తోంది. అందుకే పార్టీ పదవులు ఉన్నవారు ఎన్నికల్లో పోటీ చేయకూడదని హై కమాండ్ నిర్ణయం తీసుకున్నట్లు తెలుస్తోంది. సంస్థాగత కమిటీ, పోటీ చేసే నేతల మధ్య దూరం ఉంటే పక్షపాతం లేకుండా పని చేయవచ్చని పార్టీ వ్యూహంగా చెబుతున్నారు.

దీని ప్రకారం కొంతమంది రాష్ట్ర సంస్థాగత పదవుల నుంచి తప్పుకోవాలని ఆలోచిస్తున్నారు. వచ్చే అసెంబ్లీ ఎన్నికల్లో పోటీ చేసేందుకు అవకాశం ఉంటుందని వారు భావిస్తున్నారు. ఎవరు పదవులకు రాజీనామా చేస్తారనేది వేచి చూడాల్సి ఉంది.