సుప్రీంకోర్టు కీలక ఆదేశాలు: కోర్టు విచారణ వీడియోల అనుమతి లేని షేరింగ్‌పై నిషేధం

కోర్టు విచారణల ఆడియో, వీడియో క్లిప్పులను సోషల్ మీడియాలో అనుమతి లేకుండా షేర్ చేయడంపై సుప్రీంకోర్టు మధ్యంతర నిషేధం విధించింది. ప్రధాన న్యాయమూర్తి జస్టిస్ సూర్యకాంత్, జస్టిస్ జాయమూల్య బాగ్చి, జస్టిస్ వి మోహన్‌ల ధర్మాసనం ఈ ఆదేశాలు ఇచ్చింది.

సంబంధిత కోర్టు ముందస్తు అనుమతి లేకుండా విచారణల రికార్డులను సేకరించడం, ఎడిట్ చేయడం, మార్చడం, సోషల్ మీడియాలో పోస్ట్ చేయడం, షేర్ చేయడం, వాటి ద్వారా ఆదాయం పొందడం నిషేధమని ధర్మాసనం స్పష్టం చేసింది. సుప్రీంకోర్టు విచారణల వీడియోలను ప్రసారం చేయాలంటే సెక్రటరీ జనరల్ అనుమతి, హైకోర్టు విషయంలో రిజిస్ట్రార్ జనరల్ అనుమతి తప్పనిసరి.

సందర్భానికి విరుద్ధంగా సెలెక్టెడ్ వీడియోలు వైరల్ కావడంతో న్యాయ వ్యవస్థ గౌరవం దెబ్బతింటోందని, ప్రజల్లో అపోహలు పెరుగుతున్నాయని దాఖలైన ప్రజా ప్రయోజన వాదాన్ని పరిగణనలోకి తీసుకున్నామని కోర్టు తెలిపింది. అయితే ఈ ఆదేశాలు వార్తా కథనాలపై నిషేధం కాదని, భావ ప్రకటన స్వేచ్ఛపై ఆంక్ష కాదని ధర్మాసనం స్పష్టం చేసింది.

కోర్టు ప్రక్రియ వినోదంగా మారుతోందని, న్యాయస్థానం 24 గంటల వినోద ఛానల్ కాదని జస్టిస్ జాయమూల్య బాగ్చి వ్యాఖ్యానించారు. వర్చువల్ హియరింగ్ లింకులను విచక్షణ లేకుండా షేర్ చేస్తున్నారని, దీన్ని కూడా నియంత్రించాల్సిన అవసరం ఉందని ధర్మాసనం అభిప్రాయపడింది. సొలిసిటర్ జనరల్ తుషార్ మెహతా ఏఐ సాయంతో తప్పుడు వీడియోలు సృష్టించే ప్రమాదం ఉందని కోర్టు దృష్టికి తెచ్చారు. గతంలో తాను చెప్పని మాటలను తనకు ఆపాదిస్తూ తప్పుడు కథనాలు ప్రచురించారని సీజేఐ సూర్యకాంత్ ఆవేదన వ్యక్తం చేశారు. మెటా, ఎక్స్ సహా సోషల్ మీడియా సంస్థలకు సుప్రీంకోర్టు నోటీసులు జారీ చేసింది.