ఆరావళి పర్వత సరిహద్దు, వర్గీకరణపై సుప్రీంకోర్టు ఉన్నత స్థాయి కమిటీ

ఆరావళి పర్వత శ్రేణుల సరిహద్దుల నిర్వచనం, వర్గీకరణపై కేంద్రం సమర్పించిన నివేదికను సమీక్షించేందుకు సుప్రీంకోర్టు ఉన్నత స్థాయి కమిటీని ఏర్పాటు చేసింది. నివేదికలోని లోపాలు, కీలకమైన అస్పష్టతలను పరిష్కరించాలని కోరింది.

ఈ కమిటీకి ఇండియన్ కౌన్సిల్ ఆఫ్ ఫారెస్ట్ రీసెర్చ్ అండ్ ఎడ్యుకేషన్ (ICFRE) డైరెక్టర్ జనరల్ కాంచన్ దేవి నేతృత్వం వహించనున్నారు. ఫారెస్ట్ సర్వే ఆఫ్ ఇండియా మాజీ డైరెక్టర్ జనరల్ డాక్టర్ సుభాష్ ఆశుతోష్, జియోలాజికల్ సర్వే ఆఫ్ ఇండియా మాజీ డైరెక్టర్ డాక్టర్ రాజేంద్ర కుమార్ శర్మ, పర్యావరణ మంత్రిత్వ శాఖ మాజీ జాయింట్ సెక్రెటరీ బ్రిజ్ మోహన్ సింగ్ రాథోడ్, ఢిల్లీ విశ్వవిద్యాలయం బాటనీ విభాగం మాజీ అధిపతి ప్రొఫెసర్ అశోక్ కే భట్నాగర్ సభ్యులుగా ఉన్నారు.

బెంగళూరులోని ఇండియన్ ఇన్‌స్టిట్యూట్ ఫర్ హ్యూమన్ సెటిల్మెంట్స్ కు చెందిన ప్రొఫెసర్ జగదీష్ కృష్ణస్వామి, హర్యానా సెంట్రల్ యూనివర్సిటీకి చెందిన ప్రొఫెసర్ లక్ష్మీకాంత్ శర్మలను ప్రత్యేక ఆహ్వానితులుగా నియమించింది. ఈ కమిటీ ఆగస్టు 31 నాటికి తమ నివేదిక సమర్పించాలని సుప్రీంకోర్టు ఆదేశించింది.

గత డిసెంబర్ 29న సుప్రీంకోర్టు పర్యావరణ శాఖ కార్యదర్శి అధ్యక్షతన ఏర్పాటైన కమిటీ ఇచ్చిన నివేదిక అమలుపై స్టే విధించింది. నిపుణులతో కూడిన స్వతంత్ర కమిటీ ద్వారా పర్యావరణంపై ప్రభావాన్ని అంచనా వేయాల్సిన అవసరం ఉందని అప్పట్లోనే కోర్టు నొక్కి చెప్పింది. ఇప్పుడు ఏర్పాటైన ఈ ఉన్నత స్థాయి కమిటీ ఆ దిశగా ఒక అడుగు.