సుప్రీం కోర్టు న్యాయమూర్తుల సంఖ్య 34 నుంచి 38కి పెంపు — రాష్ట్రపతి ఆర్డినెన్స్ జారీ

రాష్ట్రపతి ద్రౌపది ముర్ము ఆర్డినెన్స్ జారీ చేయడంతో సుప్రీం కోర్టు న్యాయమూర్తుల గరిష్ట సంఖ్య 34 నుంచి 38కి పెరిగింది.

ప్రధాని నరేంద్ర మోదీ అధ్యక్షతన కేంద్ర మంత్రివర్గం ఈ ప్రతిపాదనకు ముందే ఆమోదం తెలిపింది. వచ్చే పార్లమెంట్ సమావేశాల్లో దీనికి అనుగుణంగా బిల్లు ప్రవేశపెడతారని కేంద్ర మంత్రి అశ్విని వైష్ణవ వెల్లడించారు.

ప్రస్తుతం సుప్రీం కోర్టులో CJI తో కలిపి 32 మంది న్యాయమూర్తులు సేవలందిస్తున్నారు. రెండు పోస్టులు ఖాళీగా ఉన్నాయి. ఈ ఏడాది నవంబర్ లోపు మరో నలుగురు న్యాయమూర్తులు పదవి విరమణ చేయనున్నారు.

ప్రస్తుతం సుప్రీం కోర్టులో 92,000 కేసులు పెండింగ్‌లో ఉన్నాయి. ప్రజలకు వేగంగా న్యాయం అందించాలన్న ఉద్దేశంతో కేంద్రం ఈ నిర్ణయం తీసుకున్నట్లు అశ్విని వైష్ణవ తెలిపారు. న్యాయమూర్తుల సంఖ్య పెంపు వల్ల వచ్చే అదనపు ఖర్చును భారత సంఘటిత నిధి నుంచి సమకూరుస్తారు.