మియాపూర్ 550 ఎకరాల భూమి తెలంగాణ ప్రభుత్వానిదే: సుప్రీం కోర్టు తీర్పు

మియాపూర్‌లోని 550 ఎకరాల 39 గుంటల భూమి తెలంగాణ ప్రభుత్వానికే చెందుతుందని సుప్రీం కోర్టు తీర్పు చెప్పింది. ఈ భూములపై ప్రైవేట్ వ్యక్తులు దాఖలు చేసిన పిటిషన్లను కోర్టు కొట్టివేసింది. దీంతో 23 ఏళ్ల న్యాయ పోరాటానికి ముగింపు పడింది.

రంగారెడ్డి జిల్లా శేరలింగంపల్లి మండలం మియాపూర్ పరిధిలో ఈ భూములు ఉన్నాయి. సర్వే నెంబర్ 100లో 277 ఎకరాల 5 గుంటలు, సర్వే నెంబర్ 101లో 273 ఎకరాల 34 గుంటలు ఇందులో ఉన్నాయి. జస్టిస్ ఎంఎం సుందరేష్, జస్టిస్ సతీష్ చంద్ర శర్మలతో కూడిన ధర్మాసనం ఈ తీర్పు వెల్లడించింది. 2003 ఏప్రిల్ 16న ఉమ్మడి హైకోర్టు ఇచ్చిన తీర్పును సుప్రీం కోర్టు సమర్థించింది.

ఈ భూముల వివాదానికి శతాబ్దం నాటి చరిత్ర ఉంది. నిజాం పాలనలో 1912 సర్వే ఆధారంగా ఈ భూములు సర్కారి పోరంబోకు భూములుగా నమోదయ్యాయి. 1927లో రైలీ కమిషన్ ఈ గ్రామాన్ని రఫీ ఉన్నిసా బేగంకు పునరుద్ధరించాలని సిఫారసు చేసింది. 1949 ఆగస్టు 15 నుంచి అమల్లోకి వచ్చిన జాగీర్ల రద్దు చట్టంతో ఈ భూములు ప్రభుత్వం పరిధిలోకి వచ్చాయి. జాగీర్దార్ కైసరుద్దీన్ ఖాన్‌కు 1957, 1958లలో కమ్యూటేషన్ అవార్డుల రూపంలో ప్రభుత్వం పరిహారం చెల్లించింది.

1950-53 నాటి పహానీలో రహీమున్నీసా బేగం పేరు పట్టాదారుగా నమోదు కావడంతో వివాదం మొదలైంది. ఆ ఎంట్రీల ఆధారంగా అప్పటి తహసీల్దార్ 140 ఎకరాల భూమి బదిలీకి అనుమతులు మంజూరు చేశారు. ఆ తర్వాత ప్రైవేట్ వ్యక్తులు మూడు వర్గాలుగా ఈ భూములపై హక్కులు క్లెయిమ్ చేశారు. 1994లో భూకబ్జా నిరోధక చట్టం కింద ప్రత్యేక న్యాయస్థానంలో కేసులు దాఖలయ్యాయి. 1997లో ప్రత్యేక కోర్టు భూములు ప్రభుత్వానివేనని తీర్పు ఇచ్చింది. 2003లో హైకోర్టు ఆ తీర్పును సమర్థిస్తూ పిటిషనర్లను భూకబ్జాదారులుగా తేల్చింది.

ప్రైవేట్ వ్యక్తులు చూపిన రెవెన్యూ రికార్డులు సరైనవి కావని సుప్రీం కోర్టు తెలిపింది. రెవెన్యూ అధికారులతో కలిసి సృష్టించిన బోగస్ రికార్డులుగా ధర్మాసనం పేర్కొంది. పహానీలో పేర్లు నమోదు కావడం మాత్రమే భూమిపై యాజమాన్య హక్కులు కల్పించదని కోర్టు స్పష్టం చేసింది. పిటిషనర్లకు పరిహారం గాని, ఇతర ఉపసమనాలు గాని వర్తించవని తీర్పులో పేర్కొంది.

ప్రభుత్వం తరపున సీనియర్ న్యాయవాది సీఎస్ వైద్యనాథన్ వాదనలు వినిపించారు. పాత రెవెన్యూ రికార్డులు, సేత్వార్, క్లాసర్ రిజిస్టర్లు, గతంలో వివిధ కోర్టులు ఇచ్చిన తీర్పులను ఆధారాలుగా ధర్మాసనానికి సమర్పించారు. సీఎం రేవంత్ రెడ్డి పర్యవేక్షణలో ప్రభుత్వ యంత్రాంగం న్యాయ నిపుణులతో సమన్వయం చేసి కేసు విచారణను వేగవంతం చేసింది. రాజధాని పరిసరాల్లోని ఈ భూములపై దశాబ్దాలుగా సాగుతున్న వ్యాజ్యం ఇప్పుడు ముగిసింది.