స్థానిక ఎన్నికల అభ్యర్థుల నామినేషన్లు, అఫిడవిట్లు ఆన్‌లైన్‌లో: హైకోర్టుకు SEC నివేదిక

ఆంధ్రప్రదేశ్‌లో స్థానిక సంస్థల ఎన్నికల అభ్యర్థుల నామినేషన్ పత్రాలు, అఫిడవిట్లను రాష్ట్ర ఎన్నికల సంఘం (SEC) ఆన్‌లైన్‌లో ఉంచనుంది. ఈ మేరకు హైకోర్టుకు SEC అఫిడవిట్ సమర్పించింది.

SEC అధికారిక వెబ్‌సైట్‌లో దీని కోసం ప్రత్యేక పోర్టల్ ఏర్పాటు చేసినట్టు కోర్టుకు తెలిపింది. ఈ పోర్టల్ ద్వారా మున్సిపల్, గ్రామీణ స్థానిక సంస్థల అభ్యర్థుల వివరాలు చూసుకోవచ్చు. మేయర్, మున్సిపల్ చైర్‌పర్సన్, వార్డు సభ్యుల నామినేషన్ పత్రాలను కూడా ఆన్‌లైన్‌లో అప్‌లోడ్ చేయాలని ఆదేశించినట్టు పేర్కొంది. MPTC, ZPTC, సర్పంచ్ అభ్యర్థుల నామినేషన్లు, సెల్ఫ్ అఫిడవిట్లు కూడా వెబ్‌సైట్‌లో ఉంచుతామని తెలిపింది.

ఈ అంశంపై న్యాయవాది తాండవ యోగేష్ హైకోర్టులో PIL దాఖలు చేశారు. SEC నిబంధనల ప్రకారం నామినేషన్లలో అఫిడవిట్లు ఆన్‌లైన్‌లో పెట్టాలని ఉన్నా, వాటిని అమలు చేయడం లేదని ఆయన వాదించారు. ఈ PIL నాలుగు రోజుల క్రితం విచారణకు వచ్చింది. ఇవాళ మరోసారి విచారణకు రాగా, అఫిడవిట్లను ఆన్‌లైన్‌లో ఉంచాలని నిర్ణయం తీసుకున్నట్టు SEC కోర్టుకు తెలిపింది.

సంబంధిత శాఖలన్నింటికీ ఆదేశాలు జారీ చేసినట్టు SEC అఫిడవిట్‌లో పేర్కొంది. పంచాయతీరాజ్, మున్సిపల్ శాఖ కమిషనర్లకు ఎన్నికల సంఘం లేఖ రాసింది. శాఖల వెబ్‌సైట్లలో SEC వెబ్‌సైట్ లింకులను ఇచ్చినట్టు తెలిపింది. నామినేషన్లు, అఫిడవిట్లను ఎప్పటికప్పుడు అప్‌డేట్ చేయాలని సూచించింది. పోలింగ్‌కు ముందే అభ్యర్థుల వివరాలు ప్రజలకు అందుబాటులో ఉంచాలని కోర్టు ఆదేశించింది. ప్రభుత్వం కూడా దీనికి సుముఖంగా ఉన్నట్టు విచారణ సందర్భంగా కోర్టుకు తెలిపింది. స్థానిక సంస్థల ఎన్నికలు రెండు రోజుల్లో జరగనున్న నేపథ్యంలో ఈ నిర్ణయం కీలకంగా మారింది.