బాలల అక్రమ రవాణా కేసుల్లో పోక్సో చట్టం తప్పనిసరి: సుప్రీంకోర్టు

బాలల అక్రమ రవాణా, లైంగిక దోపిడీ కేసుల్లో పోక్సో చట్టం కింద కూడా కేసులు నమోదు చేయాలని సుప్రీంకోర్టు తీర్పు వెలువరించింది. జస్టిస్ జేబీ పార్దివాల, జస్టిస్ ఆర్ మహాదేవన్లతో కూడిన ధర్మాసనం ఈ తీర్పు ఇచ్చింది.

బెదిరింపులు, బలవంతం, అపహరణ, మోసం, అధికార దుర్వినియోగం వంటి మార్గాల ద్వారా వయోజన బాధితులను దోపిడీకి గురిచేస్తే, వారి సమ్మతి ఉన్నా సరే నేరమేనని కోర్టు స్పష్టం చేసింది. బాధితురాలి అంగీకారం ఉందనే వాదన చట్టపరంగా చెల్లదు. చిన్నారుల విషయంలో బలవంతం ఉపయోగించకపోయినా, సమ్మతి అనే ప్రశ్నే ఉండదని, అది తప్పనిసరిగా నేరమేనని తెలిపింది.

దర్యాప్తు సంస్థలు నిందితుల చర్యలు, ఉద్దేశాలపైనే దృష్టి పెట్టాలని, బాధితురాలి సమ్మతి ఆధారంగా బాధ్యత తప్పించుకోలేరని కోర్టు ఆదేశించింది. లైంగిక పరిశ్రమలో ఉపాధి పొందుతున్నామని భావించినా, అక్రమ రవాణా నుంచి బాధితులు తప్పించబడరని, మోసపూరిత వాగ్దానాలతో వారిని దోపిడీకి గురిచేస్తే వారు ట్రాఫికింగ్ బాధితులుగానే పరిగణించబడతారని ధర్మాసనం వివరించింది.

మానవ అక్రమ రవాణాను రాజ్యాంగంలోని ఆర్టికల్ 23 పూర్తిగా నిషేధిస్తుందని, ఇది ప్రభుత్వాలకే కాకుండా ప్రైవేట్ వ్యక్తులకు కూడా వర్తిస్తుందని కోర్టు గుర్తుచేసింది. ప్రతి చిన్నారిపై లైంగిక దోపిడి చర్యను చట్టం ద్వారా అంగీకారం లేని నేరంగా పరిగణిస్తుంది కాబట్టి, పోక్సో చట్టం కింద విచారణ తప్పనిసరని ఆదేశించింది.

ప్రజ్వల అనే స్వచ్ఛంద సంస్థ దాఖలు చేసిన పిటిషన్పై విచారణ జరిపిన సుప్రీంకోర్టు, బాధితులకు సరైన పునరావాసం కల్పించడం రాజ్యాంగబద్ధమైన ప్రాథమిక హక్కని స్పష్టం చేసింది. ఈ తీర్పు ద్వారా అక్రమ రవాణా నేరాలపై పోరాటంలో బాధితుల రక్షణకు అదనపు బలం లభించింది.