IAS తల్లిదండ్రుల పిల్లలకు రిజర్వేషన్ ఎందుకు?: సుప్రీం కోర్టు ప్రశ్న

క్రీమీ లేయర్ వర్గాలకు రిజర్వేషన్ ప్రయోజనాలు కొనసాగించాలని కోరుతూ దాఖలైన పిటిషన్‌పై సుప్రీం కోర్టు తీవ్రమైన ప్రశ్నలు లేవనెత్తింది.

తల్లిదండ్రులు ఇద్దరూ IAS అధికారులుగా ఉన్నప్పుడు వారి పిల్లలకు వెనకబడిన తరగతుల రిజర్వేషన్ కల్పించాల్సిన అవసరం ఏమిటని న్యాయస్థానం ప్రశ్నించింది. రిజర్వేషన్లు వినియోగించుకొని ఆర్థికంగా, సామాజికంగా అత్యున్నత స్థాయికి చేరిన కుటుంబాలు తరతరాలుగా అదే కోటాను కోరుకోవడం సమంజసం కాదని స్పష్టం చేసింది.

జస్టిస్ నాగరత్న, జస్టిస్ ఉజ్జల్ భుయాన్‌లతో కూడిన ధర్మాసనం ఈ వ్యాఖ్యలు చేసింది. ఉన్నత స్థానంలో ఉన్న వారి పిల్లలకు రిజర్వేషన్లు కొనసాగిస్తే రిజర్వేషన్ వ్యవస్థ నుండి ఎప్పటికీ బయటపడలేమని ధర్మాసనం ఆందోళన వ్యక్తం చేసింది. అదే వర్గంలోని పేద, వెనకబడిన వారికి తీవ్ర అన్యాయం జరుగుతుందని కూడా పేర్కొంది.

రిజర్వేషన్ ఫలాలు సమాజంలో అట్టడుగు స్థాయిలో ఉన్న చివరి వ్యక్తికి కూడా అందాలని, అమలులో సమతుల్యత అవసరమని న్యాయమూర్తులు స్పష్టం చేశారు.

ఈ కేసులో కేంద్ర ప్రభుత్వానికి నోటీసులు జారీ చేసిన సుప్రీం కోర్టు తదుపరి విచారణను వాయిదా వేసింది.