క్రీమీ లేయర్‌పై సుప్రీం కోర్టు కీలక ప్రశ్నలు

తల్లితండ్రులిద్దరూ IAS అధికారులైతే వారి పిల్లలకు రిజర్వేషన్ ఎందుకు ఇవ్వాలని సుప్రీం కోర్టు ప్రశ్నించింది. జస్టిస్ BV నాగరత్న నేతృత్వంలోని ధర్మాసనం ఈ వ్యాఖ్యలు చేసింది.

కర్ణాటక పవర్ ట్రాన్స్మిషన్ కార్పొరేషన్ లిమిటెడ్‌లో Assistant Engineer పదవికి ఎంపికైన OBC అభ్యర్థి ఈ కేసు దాఖలు చేశాడు. అతని కుటుంబ వార్షిక ఆదాయం ₹19.48 లక్షలు ఉండటంతో క్రీమీ లేయర్ పరిమితి దాటిందని అధికారులు జాతి చెల్లుబాటు ధ్రువపత్రాన్ని నిరాకరించారు. తల్లితండ్రులిద్దరూ కర్ణాటక ప్రభుత్వ ఉద్యోగులు.

కర్ణాటక హైకోర్టు ఈ అభ్యర్థికి వ్యతిరేకంగా తీర్పు ఇచ్చింది. దీంతో అతడు సుప్రీం కోర్టును ఆశ్రయించాడు.

రిజర్వేషన్ ద్వారా మంచి స్థాయికి వచ్చిన తల్లితండ్రుల పిల్లలు మళ్లీ రిజర్వేషన్ కోరడం సరికాదని జస్టిస్ నాగరత్న అభిప్రాయపడ్డారు. ఈ పరిస్థితి కొనసాగితే రిజర్వేషన్ల నుంచి ఎప్పటికీ బయటపడలేమని ధర్మాసనం వ్యాఖ్యానించింది.