విడిపోయి ఉండటం మానసిక హింసే, విడాకులకు బలమైన కారణం: సుప్రీంకోర్టు

పెళ్లైన తర్వాత ఏళ్ల తరబడి విడిగా ఉండటం, దాంపత్య హక్కులను నిరాకరించడం మానసిక హింస కిందకు వస్తుందని, అది విడాకులకు బలమైన కారణమని సుప్రీంకోర్టు స్పష్టం చేసింది.

రాజస్థాన్ కు చెందిన ఒక డాక్టర్ దంపతుల కేసులో జస్టిస్ సంజయ్ కరోల్, జస్టిస్ ఏ.హెచ్.ఎస్. మసీహ ధర్మాసనం ఈ తీర్పు ఇచ్చింది. పెళ్లైన కొద్ది రోజులకే భార్య సహజీవనానికి దూరంగా ఉంటుందని, ఇది మానసిక హింసేనంటూ భర్త 2009 లో విడాకుల కోసం కోర్టును ఆశ్రయించాడు. రాజస్థాన్ హైకోర్టు విడాకులు మంజూరు చేసింది. అయితే భార్య ఆ తీర్పును సవాల్ చేస్తూ సుప్రీంకోర్టుకు అప్పీల్ చేసింది.

అయితే, కేవలం కాగితాలకే పరిమితమైన వివాహ బంధాన్ని నిర్జీవంగా సాగదీయడం కంటే చట్టబద్ధంగా తెంచేయడమే ఇరువురికీ, సమాజానికీ శ్రేయస్కరమని ధర్మాసనం వ్యాఖ్యానించింది. రాజ్యాంగంలోని ఆర్టికల్ 142 ద్వారా తనకున్న ప్రత్యేక అధికారాలను ఉపయోగించి, ఈ వివాహ బంధాన్ని రద్దు చేస్తున్నట్లు ప్రకటించింది. విడాకులు ఇవ్వడంలో హైకోర్టు తీర్పు సరైనదేనని సుప్రీంకోర్టు సమర్థించింది.