రుణ వసూళ్లపై బ్యాంకులను సుప్రీం కోర్టు తీవ్రంగా మందలించింది

ప్రజల సొమ్మును ఉదారంగా రుణాలుగా ఇస్తున్న బ్యాంకులు వాటి వసూలుపై గట్టి చర్యలు తీసుకోకపోవడం ఆమోదయోగ్యం కాదని సుప్రీం కోర్టు స్పష్టంగా పేర్కొంది. బ్యాంకులు, ఆస్తుల పునర్నిర్మాణ కంపెనీలు, రుణగ్రహితల మధ్య లోతైన అవినీతి వ్యవహారాలు ఉన్నాయని CJI నేతృత్వంలోని త్రిసభ్య ధర్మాసనం ఆక్షేపించింది.

ప్రజా సంక్షేమానికి ఉపయోగపడాల్సిన ప్రభుత్వ ధనం దుర్వినియోగం అవుతుందని ధర్మాసనం తీవ్ర ఆందోళన వ్యక్తం చేసింది. 1537 కోట్ల రూపాయల బకాయిలను వసూలు చేయాల్సిన ప్రభుత్వ రంగ బ్యాంకులు కేవలం 73.50 కోట్లకే రెండు ARC లతో పరిష్కారం కుదుర్చుకోవడాన్ని సవాలు చేస్తూ దాఖలైన వ్యాజ్యంపై సుప్రీం కోర్టు విచారణ చేపట్టింది.

ఈ పిటిషన్‌కు సమాధానం ఇవ్వాలంటూ కేంద్ర ప్రభుత్వం, RBI తదితరులకు నోటీసులు జారీ చేసింది. బ్యాంకులు పన్ను చెల్లింపుదారుల సొమ్మును, ప్రజల డబ్బును సేకరించి బాధ్యతారహితంగా విడుదల చేస్తున్నాయని ధర్మాసనం పేర్కొంది. రుణాల వసూలుకు ఎటువంటి ప్రయత్నం చేయకపోవడం ఏమాత్రం సమర్థనీయం కాదని తెలిపింది.

ARC ల పనితీరును లోతుగా పరిశీలించాల్సిన అవసరం ఉందని ధర్మాసనం అభిప్రాయపడింది. తదుపరి విచారణను నాలుగు వారాలకు వాయిదా వేసింది.