కామారెడ్డి జిల్లాలో భారీ వర్షం.. వాగులు, వంకలు పొంగి రాకపోకలు నిలిచిపోయాయి

గడచిన రాత్రి నుంచి కామారెడ్డి జిల్లాలో భారీ వర్షం కురుస్తోంది. దీంతో వాగులు, వంకలు పొంగి ప్రవహిస్తున్నాయి. పలు ప్రాంతాల్లో రాకపోకలు నిలిచిపోయాయి.

కామారెడ్డి పట్టణంలో ఓ ప్రైవేటు ట్రావెల్స్ బస్సు నీటిలో చిక్కుకుపోయింది. పోలీసులు అప్రమత్తమై బస్సును సురక్షితంగా బయటకు తీశారు. పెద్ద చెరువు ఉదృతంగా ప్రవహిస్తోంది. ఆచారెడ్డి, తాడువాయి, బిక్కనూరు, రాజపేట మండలాల్లో వాగులు ప్రవహించడంతో గ్రామాలకు రాకపోకలు స్తంభించాయి.

ఎల్లారెడ్డి నియోజకవర్గంలోని లింగంపేట వద్ద పాములవాగు ఉదృతంగా ప్రవహించింది. పిట్లం మండలంలో కాకి వాగు పొంగి పిట్లం, కంబాపూర్‌కు రాకపోకలు నిలిచిపోయాయి. బాన్సవాడ మండలం మొగులాలపల్లి గ్రామంలో అనేక ఇళ్లల్లోకి వరద నీరు చేరింది. ప్రజలు బంధువుల ఇళ్లకు తరలివెళ్లారు.

జిల్లాలోని నిజాంసాగర్ ప్రాజెక్టుకు 6600 క్యూసెక్కుల ప్రవాహం వచ్చి చేరుతోంది. ప్రాజెక్టులో నీటి నిల్వ 8 టీఎంసీలకు చేరుకుంది. పూర్తి సామర్థ్యం 17.8 టీఎంసీలు కాగా, అదనపు నీటి వరదతో నిండుతోంది. పోచారం ప్రాజెక్టు కూడా నిండుకుండలా మారింది.

అధికారులు అప్రమత్తంగా ఉండి, వరద నీరు సాఫీగా వెళ్లేలా చర్యలు చేపట్టారు. ఎస్పీ, జిల్లా అధికారులు ప్రాంతాలను పరిశీలించారు. ప్రస్తుతం వర్షం తగ్గింది కానీ వరద ప్రభావం కొనసాగుతోంది.