తిరుపతి హోటళ్లలో పాడైన ఆహారం: ఫుడ్ సేఫ్టీ అధికారుల తనిఖీలు, పలు హోటళ్లు సీజ్

తిరుపతిలో ఫుడ్ సేఫ్టీ అధికారులు హోటళ్లు, రెస్టారెంట్లు, మాంసం దుకాణాలు, చేపల మార్కెట్లలో ఆకస్మిక తనిఖీలు నిర్వహించారు. పాడైన ఆహార పదార్థాలను స్వాధీనం చేసుకుని, నిబంధనలు పాటించని పలు సంస్థలకు నోటీసులు జారీ చేశారు.

తనిఖీల్లో కుళ్లిన చికెన్, పాడైన చేపలు, గడువు ముగిసిన పెరుగు, పాత వంట నూనెలు, అపరిశుభ్రంగా నిల్వ ఉంచిన కూరగాయలు వెలుగులోకి వచ్చాయి. కిచెన్లలో బొద్దింకలు, పురుగులు కనిపించాయి. భక్తులు చేసిన ఫిర్యాదులతో అధికారులు రంగంలోకి దిగారు.

ఇటీవల ఒక బిర్యానీ హోటల్లో చిన్నారి అస్వస్థతకు గురికావడంతో అధికారులు తనిఖీ చేపట్టగా, చెడిపోయిన ఆహారం లభించింది. ఆ హోటల్ను సీజ్ చేశారు. మున్సిపల్ కార్పొరేషన్ ఆరోగ్య విభాగంతో కలిసి జిల్లా కలెక్టర్, కమిషనర్ ఆదేశాల మేరకు తనిఖీలు చేపట్టినట్టు అధికారులు తెలిపారు.

పీపీ చావడి ప్రాంతంలో బిల్లులు లేకుండా టన్నుల కొద్దీ మాంసం నిల్వ ఉంచిన సంస్థను మూసివేశారు. చేపల మార్కెట్లో పురుగులు పట్టిన చేపలు గుర్తించి రెండు దుకాణాలు సీజ్ చేశారు. మల్టీనేషనల్ రెస్టారెంట్లు, డార్క్ స్టోర్లలోనూ గడువు ముగిసిన ఉత్పత్తులు, చెడిపోయిన కూరగాయలు, పాల పదార్థాలు గుర్తించి నోటీసులు ఇచ్చి జరిమానా విధించారు.

ప్రజలు అప్రమత్తంగా ఉండాలని, దుర్వాసన వచ్చే ఆహారం కనిపిస్తే ఫుడ్ సేఫ్టీ శాఖకు ఫిర్యాదు చేయాలని అధికారులు సూచించారు. తనిఖీలు నిరంతరం కొనసాగుతాయని, నిబంధనలు ఉల్లంఘించిన వారిపై కఠిన చర్యలు తీసుకుంటామని హెచ్చరించారు.