అన్నమయ్య జిల్లా రైతు ఖర్జూర సాగుతో మంచి లాభాలు

అన్నమయ్య జిల్లా రాయచోటి మండలం కమ్మరిపల్లి గ్రామానికి చెందిన రైతు సురేందర్ రెడ్డి మూడు ఎకరాల్లో ఖర్జూర సాగు చేస్తున్నారు. సంప్రదాయ పంటలకు మద్దతు ధర సరిగా రాకపోవడంతో ఆరేళ్ల క్రితం ఖర్జూర మొక్కలు నాటారు. గతేడాది మొదటి పంట దిగుబడి తీశారు. ప్రస్తుతం రెండో పంట కోసం సిద్ధమవుతున్నారు.

సురేందర్ రెడ్డి 200 ఖర్జూర చెట్లు నాటారు. ఒక్కో చెట్టు ₹4,000 ధర పడింది. మొదటి ఏడాది drip సదుపాయం, భూమి సన్నద్ధత కలిపి ఎకరాకు సుమారు ₹4 లక్షల ఖర్చు అయింది. తర్వాతి సంవత్సరాల్లో ఖర్చు తగ్గుతుందని చెప్తున్నారు.

ఖర్జూర చెట్టు 50 నుండి 60 సంవత్సరాల వరకు దిగుబడి ఇస్తుంది. ఏడాదికి ఒకసారి పంట వస్తుంది. తక్కువ నీరు సరిపోతుందని, drip ద్వారా నీరు అందిస్తున్నారని సురేందర్ రెడ్డి తెలిపారు. పంటను స్థానికంగానే అమ్ముతూ మంచి ఆదాయం పొందుతున్నారు.

ఇలాంటి పంటలకు ప్రభుత్వం ప్రోత్సాహం అందిస్తే మరింత మంది రైతులు లాభపడతారని సురేందర్ రెడ్డి అభిప్రాయపడ్డారు.