హైదరాబాద్ లో ఎబోలా అనుమానిత కేసులు: ఇద్దరు ఇసోలేషన్ వార్డులో

హైదరాబాద్ లో ఇద్దరు వ్యక్తుల్లో ఎబోలా వైరస్ లక్షణాలు కనిపించడంతో వారిని ప్రత్యేక ఐసోలేషన్ వార్డుకు తరలించారు. అనుమానితులను గాంధీ ఆసుపత్రిలో ఉంచి చికిత్స అందిస్తున్నారు.

వీరిలో ఒకరు సూడాన్ దేశానికి చెందిన వ్యక్తి కాగా, ఆయన ఉగాండా, సూడాన్ నుంచి ప్రయాణించి శంషాబాద్ విమానాశ్రయానికి వచ్చారు. విమానాశ్రయంలో ఆయనకు జ్వరం, ఇతర ఎబోలా లక్షణాలు కనిపించడంతో అప్రమత్తమైన అధికారులు వెంటనే గాంధీ ఆసుపత్రికి తరలించారు. మరొక అనుమానిత వ్యక్తిని అపోలో ఆసుపత్రి నుంచి గాంధీ ఆసుపత్రికి బదిలీ చేశారు.

ఈ అనుమానిత కేసుల నమూనాలను సేకరించి పూణెలోని నేషనల్ ఇన్స్టిట్యూట్ ఆఫ్ వైరాలజీకి పరీక్ష నిమిత్తం పంపించారు. నివేదిక వచ్చేవరకు వారిని ఐసోలేషన్‌లో ఉంచుతామని ఆసుపత్రి వర్గాలు తెలిపాయి. ఇది ఎబోలా కేసు అని నిర్ధారణ కాలేదని, కేవలం ముందస్తు భద్రత చర్యల్లో భాగంగానే ఐసోలేషన్ చేసినట్లు అధికారులు స్పష్టం చేశారు.

ఆఫ్రికా దేశాల్లో ఎబోలా వైరస్ వ్యాప్తి నేపథ్యంలో కేంద్ర ప్రభుత్వం ఇప్పటికే అప్రమత్తం చేసింది. శంషాబాద్ విమానాశ్రయంలో ప్రయాణికులను క్షుణ్ణంగా పరీక్షిస్తున్నారు. ఇతర దేశాల నుంచి వచ్చే ప్రయాణికులను కూడా నిఘాలో ఉంచుతున్నారు.

పరీక్ష నివేదిక రావడానికి సుమారు 20 రోజులు పట్టవచ్చని, అప్పటి వరకు వీరిని ఐసోలేషన్‌లో ఉంచి చికిత్స కొనసాగిస్తామని ఆసుపత్రి సిబ్బంది తెలిపారు. ప్రస్తుతం ఇద్దరి ఆరోగ్య పరిస్థితి నిలకడగా ఉందని, ప్రాణాపాయం లేదని వారు వెల్లడించారు.