సూడాన్ నుంచి వచ్చిన ప్రయాణికుడిలో అనుమానిత ఎబోలా లక్షణాలు; గాంధీ ఆసుపత్రికి తరలింపు

జూన్ 4న సూడాన్ నుంచి హైదరాబాద్ శంషాబాద్ విమానాశ్రయానికి వచ్చిన ఓ ప్రయాణికుడిలో జ్వరం గుర్తించారు. టెర్మల్ స్క్రీనింగ్‌లో శరీర ఉష్ణోగ్రత 100°F కంటే ఎక్కువగా నమోదైంది. అనుమానంతో అతన్ని వెంటనే సికింద్రాబాద్‌లోని గాంధీ ఆసుపత్రి ఐసోలేషన్ వార్డుకు తరలించారు.

వైద్యులు తెలిపిన వివరాల ప్రకారం, ప్రయాణికుడి ఆరోగ్యం ప్రస్తుతం నిలకడగా ఉంది. తీవ్రమైన కండరాల నొప్పి, అధిక జ్వరం వంటి లక్షణాలు కనిపించడం లేదు. ఎబోలా నిర్ధారణ కోసం అతని రక్త నమూనాలను హైదరాబాద్‌లోని సెంటర్ ఫర్ సెల్యులార్ అండ్ మాలిక్యులర్ బయాలజీ (CCMB)కు పంపించారు. ఫలితాలు రావడానికి 2 నుంచి 3 రోజులు పట్టవచ్చని అధికారులు చెప్పారు.

కేంద్ర ప్రభుత్వ మార్గదర్శకాల ప్రకారం, ఆఫ్రికా దేశాల నుంచి వచ్చే ప్రయాణికులు 21 రోజుల పాటు స్వీయ ఐసోలేషన్‌లో ఉండాలి. ఏవైనా లక్షణాలు కనిపిస్తే 1075 హెల్ప్‌లైన్‌ను సంప్రదించాలి. ఇప్పటివరకు భారతదేశంలో ఒక్క ఎబోలా పాజిటివ్ కేసు కూడా నమోదు కాలేదని ఆరోగ్య శాఖ స్పష్టం చేసింది. అయితే ముందుజాగ్రత్త చర్యల్లో భాగంగా అనుమానితుల నమూనాలను పరీక్షిస్తున్నారు.