సింగరేణికి తాడిచెర్ల-2 బొగ్గు గని కేటాయింపు: కేంద్ర మంత్రి కిషన్ రెడ్డి

కేంద్ర మంత్రి కిషన్ రెడ్డి తాడిచెర్ల-2 బొగ్గు గనిని సింగరేణి కాలరీస్ కంపెనీ లిమిటెడ్ (SCCL) కు కేటాయించినట్లు ప్రకటించారు. ఈ నిర్ణయానికి ప్రధాని నరేంద్ర మోదీ ఆమోదం లభించిందని, తాను ఇప్పుడే ఫైల్ పై సంతకం చేశానని ఢిల్లీలో మీడియాతో మాట్లాడుతూ ఆయన తెలిపారు.

ఈ బొగ్గు బ్లాక్ లో 82 మిలియన్ టన్నుల నిల్వలు ఉన్నాయని, ఏడాదికి 6 మిలియన్ టన్నుల చొప్పున 40–50 ఏళ్ల వరకు ఉత్పత్తి సాధ్యమని కిషన్ రెడ్డి వివరించారు. నాణ్యమైన గ్రేడ్ కలిగిన ఈ బొగ్గు ద్వారా సింగరేణికి జీవితకాలంలో రూ.64 వేల కోట్ల ఆదాయం వస్తుందని, వేలం లేకుండా నేరుగా కేటాయించడం వల్ల రూ.2,500–3,000 కోట్ల ప్రీమియం ఆదా అవుతుందని ఆయన చెప్పారు.

సింగరేణి కార్మికులు, ట్రేడ్ యూనియన్లు, తెలంగాణ ప్రభుత్వం, రాజకీయ పార్టీల నుంచి వచ్చిన విజ్ఞప్తుల మేరకు ఈ నిర్ణయం తీసుకున్నామని మంత్రి తెలిపారు. సింగరేణిలో బొగ్గు ఉత్పత్తి, ఉద్యోగాలు తగ్గుతూ ఆర్థిక ఇబ్బందులు ఎదురవుతున్న నేపథ్యంలో ఈ కేటాయింపు సంస్థ పునరుజ్జీవానికి దోహదపడుతుందని ఆయన అన్నారు. తాడిచెర్ల-2 బ్లాక్ లో 1,200 మందికి ప్రత్యక్ష ఉద్యోగాలు లభిస్తాయని, ఇప్పటికే నైనీ బ్లాక్ లో 1,500 ఉద్యోగాలు కల్పించామని ఆయన వివరించారు.

తెలంగాణ ప్రభుత్వానికి ఈ బ్లాక్ నుంచి రూ.16 వేల కోట్ల ఆదాయం సమకూరుతుందని కూడా కిషన్ రెడ్డి తెలిపారు. 2020 తర్వాత ఏ ప్రభుత్వ రంగ సంస్థకు ఇలా ప్రత్యక్షంగా బొగ్గు గని కేటాయించలేదని, సింగరేణి 100% ప్రభుత్వ యాజమాన్యంలో ఉండటంతో ప్రత్యేక నిబంధనల కింద ఈ అవకాశం కల్పించామని ఆయన చెప్పారు. ఈ సందర్భంగా తెలంగాణ ప్రజల తరఫున ప్రధానికి ధన్యవాదాలు తెలుపుతున్నట్లు మంత్రి ప్రకటించారు.