తాజ్ మహల్‌ను శివాలయంగా ప్రకటించాలన్న పిటిషన్‌పై కేంద్రం, ASI కి హైకోర్టు నోటీసులు

తాజ్ మహల్‌ను ప్రాచీన శివాలయంగా ప్రకటించాలంటూ దాఖలైన పిటిషన్‌పై అలహాబాద్ హైకోర్టు కేంద్ర ప్రభుత్వానికి, ఆర్కియలాజికల్ సర్వే ఆఫ్ ఇండియా (ASI) కి నోటీసులు జారీ చేసింది. ఈ అంశంపై కౌంటర్ అఫిడవిట్ దాఖలు చేయాలని కోర్టు ఆదేశించింది. ఆగ్రా కోర్టు ఇంతకుముందు ఇదే పిటిషన్ ను తిరస్కరించడంతో, పిటిషనర్లు హైకోర్టును ఆశ్రయించారు.

ఈ పిటిషన్ సుప్రీంకోర్టు న్యాయవాది హరిశంకర్ జైన్ ద్వారా శ్రీ అగ్రేశ్వర్ మహాదేవ్ నాగనాదేశ్వర్ విరాజ్మాన్ దేవత తరపున దాఖలైంది. తాజ్ మహల్ నిజానికి తేజో మహాలయ అనే పురాతన శివాలయమని, దాన్ని ఆలయంగా పునరుద్ధరించి హిందువులకు పూజల నిర్వహణకు అనుమతి ఇవ్వాలని పిటిషనర్లు కోరుతున్నారు. రాజ్యాంగంలోని ఆర్టికల్ 25 ప్రకారం మత స్వేచ్ఛ హక్కును ఉటంకిస్తూ, ఈ డిమాండ్ చేశారు.

పిటిషనర్ల వాదన ప్రకారం, క్రీస్తుశకం 1155-56 ప్రాంతంలో రాజా పరమర్థిదేవ్ ఈ ఆలయాన్ని నిర్మించారు. తర్వాత ఇది జైపూర్ రాజు రాజా జైసింగ్ ఆధీనంలోకి వచ్చింది. మొఘల్ చక్రవర్తి షాజహాన్ దీన్ని బలవంతంగా స్వాధీనం చేసుకుని, ఇస్లామిక్ శైలిలో మార్పులు చేసి, తన భార్య ముంతాజ్ మహల్ సమాధిగా మార్చాడని పిటిషనర్లు ఆరోపిస్తున్నారు. తాజ్ మహల్ డోమ్ మీద ఉన్న కలశం, తామర పూల డిజైన్లు హిందూ దేవాలయ నిర్మాణ శైలిని సూచిస్తున్నాయని వారు కోర్టుకు తెలిపారు.

2019లో ఇదే అంశంపై ఆగ్రా కోర్టులో పిటిషన్ వేయగా, సర్వే నంబర్లు, ఆస్తి సరిహద్దులకు సంబంధించిన రెవెన్యూ రికార్డులు సరిపోలకపోవడంతో కోర్టు దాన్ని కొట్టివేసింది. తాజాగా హైకోర్టు ఆదేశాలతో కేసు మళ్లీ చర్చలోకి వచ్చింది. ఇకపై ASI సమర్పించే కౌంటర్ అఫిడవిట్ ఆధారంగా, జ్ఞానవాపి తరహాలో తాజ్ మహల్ లోపల శాస్త్రీయ సర్వే జరిగే అవకాశం ఉంది.