పనితీరు ఆధారంగానే టికెట్లు: TVK ఎమ్మెల్యేలకు సీఎం విజయ్ సూచన

తమిళనాడు ముఖ్యమంత్రి విజయ్ తన పార్టీ TVK ఎమ్మెల్యేలందరినీ మహాబలిపురంలోని ఒక రిజార్ట్‌కు రమ్మని ఆదేశించారు. వచ్చే ఎన్నికల్లో టికెట్లు పనితీరు ఆధారంగానే ఇస్తామని ఆయన స్పష్టం చేశారు.

నిన్న కొంతమంది ఎమ్మెల్యేలతో ఆయన వ్యక్తిగతంగా సమావేశమయ్యారు. మిగిలిన ప్రజా ప్రతినిధులతో ఈరోజు, రేపు సమావేశాలు జరగనున్నాయి. అధికారంలో ఉన్నామని విర్రవీగకూడదని ఎమ్మెల్యేలకు ఆయన సూచించారు.

ప్రతిపక్షాల ఉచ్చులో పడవద్దని, ప్రలోభాలకు లొంగవద్దని, అధికారాన్ని దుర్వినియోగం చేయవద్దని ఆయన చెప్పారు. ప్రజల సమస్యలపై స్పందించి వాటిని పరిష్కరించాలని ఆదేశించారు. అధికారులతో, ప్రజలతో ఎలా వ్యవహరించాలనే అంశాలపై కూడా హితబోధ చేస్తున్నారు.

శాంతిభద్రతలపై DMK అధ్యక్షుడు, మాజీ ముఖ్యమంత్రి స్టాలిన్ విమర్శలు చేశారు. ఒకే రోజు 17 హత్యలు జరిగాయని ఆయన ఆరోపించారు. TVK ప్రజా ప్రతినిధులపై ముఖ్యమంత్రికి నియంత్రణ లేదని కూడా స్టాలిన్ అన్నారు. AIADMK ప్రధాన కార్యదర్శి టీవీ దినకరన్ సైతం TVK నేతలపై విమర్శలు చేశారు. పాఠశాల విద్యార్థినులను TVK ప్రజా ప్రతినిధులు వేధిస్తున్నారని ఆయన ఆరోపించారు.

డిప్యూటీ స్పీకర్ ఎం రవిశంకర్‌పై కూడా ఆరోపణలు వచ్చాయి. తిరుచి జిల్లా తురయూరులో తాగునీరు సమస్యలపై ప్రశ్నించిన పార్టీ కార్యకర్త కార్తీక్ కుమార్‌పై ఆయన చేయి చేసుకున్నారని ఆరోపణలు వచ్చాయి. ఆ వీడియోను బలవంతంగా తీయించారని కార్తీక్ కుమార్ మరో వీడియోలో ఆరోపించారు. ఈ వ్యవహారంపై పార్టీ నాయకత్వం అంతర్గత విచారణకు ఆదేశించింది. కల్లకుర్చి ఎమ్మెల్యే సి అరుల్ విగ్నేష్ మహిళా కలెక్టర్‌కు అసభ్య మెసేజ్‌లు పంపారని ఆరోపణలు వచ్చాయి. ఆ ఆరోపణలను ఎమ్మెల్యే అరుల్ విగ్నేష్ ఖండించారు.

మంత్రి శరత్ కుమార్‌పై డ్రగ్స్ ఆరోపణలు వినిపిస్తున్నాయి. కొందరు ప్రజా ప్రతినిధులు భూకబ్జాలు చేస్తున్నారన్న ఆరోపణలు కూడా ఉన్నాయి. కొందరు TVK ఎమ్మెల్యేలు విపక్షాలతో బేరసారాలు చేశారన్న వార్తలు తమిళనాడులో చర్చకు దారితీశాయి. ఈ నేపథ్యంలో ఎమ్మెల్యేలతో వ్యక్తిగత సమావేశాలు నిర్వహిస్తూ సీఎం విజయ్ జాగ్రత్తలు తీసుకుంటున్నారు.