తమిళనాడులో సినీ నటుల రాజకీయ వ్యూహం: సేవా కార్యక్రమాల ద్వారా అధికారం

తమిళనాడులో సినీ నటులు రాజకీయాల్లో ప్రవేశించడానికి ఒక దీర్ఘకాల వ్యూహాన్ని అనుసరిస్తున్నారు. ముందుగా అభిమాన సంఘాలను ఏర్పాటు చేసి, సామాజిక సేవా కార్యక్రమాలు నిర్వహిస్తారు. తర్వాత రాజకీయ పార్టీని స్థాపించి ఎన్నికల్లో పోటీ చేస్తారు.

గతంలో ఎంజీ రామచంద్రన్ (ఎంజీఆర్), జయలలితలు ఈ విధానాన్ని అనుసరించి తమిళనాడు రాజకీయాలలో విజయం సాధించారు. ఇటీవల నటుడు విజయ్ కూడా ఇదే బాటలో నడిచారు. విజయ్ 2009లో అభిమాన సంఘాలను ఏర్పాటు చేశారు. రక్తదాన శిబిరాలు, ఉచిత భోజనం, తాగునీటి ప్రాజెక్టులు వంటి సేవా కార్యక్రమాలు నిర్వహించారు. ఈ కృషి ఫలితంగా ఆయన రాజకీయ పార్టీని స్థాపించి ఇటీవలి ఎన్నికల్లో విజయం సాధించారు.

ఇదే మార్గంలో ప్రస్తుతం పలువురు నటులు ముందుకు సాగుతున్నారు. నటుడు ధనుష్ అభిమానులతో సమావేశాలు నిర్వహిస్తూ, తన ఫ్యాన్ ఫ్లాగ్ను విడుదల చేశారు. ఈ ఫ్లాగ్ ఆంధ్రప్రదేశ్ జనసేన పార్టీ జెండాను పోలి ఉంది. దీంతో ఆయన రాజకీయ ప్రవేశానికి సిద్ధమవుతున్నారని చర్చ జరుగుతోంది.

రాఘవ లారెన్స్ తన చారిటీ ట్రస్ట్ ద్వారా అనాథ పిల్లలు, వికలాంగులకు సహాయం, గుండె ఆపరేషన్లు వంటి సేవా కార్యక్రమాలు చేస్తున్నారు. త్వరలో టీవీకే తరపున ఆయన ఎన్నికల్లో పోటీ చేసే అవకాశం ఉంది. నటుడు సూర్య అగరం ఫౌండేషన్ ద్వారా పేద విద్యార్థులకు స్కాలర్‌షిప్‌లు అందిస్తున్నారు. ప్రస్తుతం రాజకీయాల్లోకి రారని ఆయన అభిమాన వర్గాలు ప్రకటించాయి. నటుడు విశాల్ రక్తదాన శిబిరాలు, రైతు సహాయ కార్యక్రమాలు నిర్వహించి, నడిగర సంఘం ఎన్నికల్లో గెలిచారు. ఆయన త్వరలో ప్రత్యక్ష రాజకీయాల్లోకి రావచ్చని భావిస్తున్నారు.