భూమి వివాదంపై మాజీ స్పీకర్ తమ్మినేని సీతారాం వీడియో: ‘ఎలాంటి తప్పు చేయలేదు’

AP మాజీ స్పీకర్ తమ్మినేని సీతారాం తనపై ఆరోపణలు ఉన్న భూమి వివాదంపై వీడియో విడుదల చేశారు. ఎలాంటి తప్పు చేయలేదని, చట్టపరమైన పద్ధతిలోనే భూమి కొనుగోలు జరిగిందని ఆయన వివరించారు.

ఈ వివాదాస్పద భూమిని డాక్యుమెంట్ రైటర్లు, మధ్యవర్తులు చూపిన పత్రాల ఆధారంగా కొనుగోలు చేశామని తమ్మినేని తన వీడియోలో పేర్కొన్నారు. సబ్ రిజిస్ట్రార్ కార్యాలయంలో పత్రాలు సమర్పించగా, పరిశీలన అనంతరం రిజిస్ట్రేషన్ జరిగిందని, ఆ సమయంలో ఎలాంటి అభ్యంతరాలు రాలేదని ఆయన చెప్పారు.

తర్వాత భూమి యాజమాన్యంపై వివాదం ఉన్నట్లు తెలిసిందని, వెంటనే సివిల్ కోర్టును ఆశ్రయించామని తమ్మినేని తెలిపారు. ఈ భూమి వివాదం కేసు ఏడాదిన్నరగా సివిల్ కోర్టులో నడుస్తోందని, ఇలాంటి సమయంలో క్రిమినల్ కేసు నమోదు చేయడం ఆశ్చర్యంగా ఉందన్నారు.

తాము ఎలాంటి ఉద్దేశపూర్వక తప్పు చేయలేదని, దర్యాప్తు జరిపినా పూర్తిగా సహకరిస్తామని ఆయన హామీ ఇచ్చారు. చట్టం ఏ నిర్ణయం తీసుకున్నా దాన్ని గౌరవిస్తామని చెప్పారు. ఈ వ్యవహారంపై ఫిర్యాదుదారుల స్పందన తెలియాల్సి ఉంది.