గవర్నర్ కోటా ఎమ్మెల్సీ స్థానాల కోసం టీడీపీలో రేసు మొదలు; ఇద్దరు సభ్యుల పదవీకాలం 28న ముగింపు

ఏపీలో గవర్నర్ నామినేటెడ్ కోటాలో ఖాళీ అవుతున్న రెండు ఎమ్మెల్సీ స్థానాల కోసం తెలుగుదేశం పార్టీలో పోటీ మొదలైంది. శాసన మండలి డిప్యూటీ చైర్మన్ జాకియా ఖానం, ఎమ్మెల్సీ పండుల రవీంద్రబాబు పదవీ కాలం ఈ నెల 28తో ముగియనుంది.

ఈ స్థానాల భర్తీపై పార్టీ అధిష్టానం కసరత్తు చేస్తోంది. రాజ్యసభ సీటు ఆశించి భంగపడిన వర్ల రామయ్య పేరు ఒక స్థానానికి విస్తృతంగా ప్రచారంలో ఉంది. మరో సీటు రాయలసీమ ప్రాంత నేతకు కేటాయించే అవకాశాలున్నాయి.

ఉమ్మడి కృష్ణా జిల్లా నుండి దేవినేని ఉమా, వంగవీటి రాధ, బుద్ధ వెంకన్న, టీడీ జనార్ధన్ వంటి సీనియర్ నేతలు పోటీలో ఉన్నారు. గోదావరి జిల్లాల నుండి క్షత్రియ సామాజిక వర్గానికి చెందిన మంతిన సత్యనారాయణ రాజు కూడా ఆశావహుడిగా ఉన్నారు. రాయలసీమ వర్గంలో రెడ్డప్పగారి శ్రీనివాస్ రెడ్డి, తిప్పేస్వామి, మాజీ ఎమ్మెల్సీ బీటెక్ రవి, మాజీ ఎమ్మెల్యే లింగారెడ్డిలతో పాటు అనంతపురం నేత ప్రభాకర్ చౌదరి పేర్లు వినిపిస్తున్నాయి.

ఈ రెండు స్థానాలకు డజనుకు పైగా నేతలు పోటీపడుతున్నా, 2027లో ఎమ్మెల్యే, స్థానిక సంస్థలు, పట్టభద్రుల కోటాలో శాసన మండలి సీట్లు భారీగా ఖాళీ కానున్న నేపథ్యంలో ఇప్పుడు అవకాశం దక్కనివారికి భవిష్యత్తులో సర్దుబాటు చేసే అవకాశం ఉందని పార్టీ వర్గాలు సంకేతాలు ఇస్తున్నాయి.