టీడీపీ ఇంటింటికి తెలుగుదేశం: 23.63 లక్షల ఇళ్లలో ప్రచారం; మంత్రులకు లోకేష్ ఆదేశాలు

టీడీపీ వర్కింగ్ ప్రెసిడెంట్ నారా లోకేష్ మంత్రులకు కొత్త ఆదేశాలు జారీ చేశారు. ఇంటింటికి తెలుగుదేశం కార్యక్రమంలో భాగంగా తమకు కేటాయించిన జిల్లాల్లో తప్పనిసరిగా పర్యటించాలని సూచించారు. ప్రజలతో నేరుగా మమేకమై వారి సమస్యలు తెలుసుకోవాలన్నారు.

పార్టీ ప్రతినిధులు తొమ్మిదో రోజు 3,32,229 ఇళ్లను సందర్శించారు. తొమ్మిది రోజుల క్యాంపెయిన్‌లో ఇప్పటివరకు 23.63 లక్షల గృహాలకు వెళ్లినట్టు పార్టీ వర్గాలు తెలిపాయి. రాష్ట్ర ప్రభుత్వం గత రెండేళ్లలో చేపట్టిన అభివృద్ధి, సంక్షేమ పథకాల వివరాలను ప్రజలకు వివరిస్తున్నారు. సూపర్ సిక్స్ హామీల అమలుపై కూడా అవగాహన కల్పిస్తున్నారు.

45 రోజుల పాటు కొనసాగే ఈ డోర్ టు డోర్ కార్యక్రమంలో భాగంగా కడప జిల్లా కమలాపురం నియోజకవర్గంలోని చెన్నూరు మండలం వనం వీధిలో ఎమ్మెల్యే పుట్టా కృష్ణ చైతన్య పాల్గొన్నారు. సంక్షేమ పథకాలు అందకపోతే వాటిని సరిచేసేలా చర్యలు తీసుకోవాలని ఆయన సూచించారు. ప్రజలు కూడా ప్రభుత్వ పథకాలను వినియోగించుకోవాలని పిలుపునిచ్చారు.