విదేశీ శక్తులు కాంగ్రెస్ ద్వారా భారత అస్థిరతకు ప్రయత్నాలు : టీడీపీ నేత పట్టాభి రామ్

టీడీపీ నేత పట్టాభి రామ్ ఢిల్లీలోని జంతర్ మంతర్ వద్ద జరుగుతున్న నిరసనల వెనుక అమెరికా, చైనా వంటి ప్రపంచ శక్తుల ప్రమేయం ఉందని ఆరోపించారు. రిపబ్లిక్ వరల్డ్ చానల్‌లో జరిగిన చర్చా కార్యక్రమంలో ఆయన ఈ వ్యాఖ్యలు చేశారు.

పార్లమెంటుకు కేవలం 2 నుంచి 3 కిలోమీటర్ల దూరంలో ఉన్న జంతర్ మంతర్ వద్ద హింసాత్మక గుంపు గుమిగూడడం ప్రమాదకరమని, పదివేల మంది గుంపు పార్లమెంట్ వైపు మార్చి చేస్తే భద్రతా ఏజెన్సీలు ఆపక తప్పదని ఆయన చెప్పారు. "పార్లమెంటును కూల్చేసి నేపాల్ తరహాలో మారుస్తామని ఈ గుంపు చెబుతోంది" అని అన్నారు.

ప్రధాన ప్రతిపక్షం కాంగ్రెస్ పార్టీ 2008లో చైనా కమ్యూనిస్ట్ పార్టీతో అవగాహన ఒప్పందం (ఎంఓయూ) కుదుర్చుకుందని, చైనా నుంచి నిధులు తీసుకుందని పట్టాభి రామ్ ఆరోపించారు. గాంధీ కుటుంబం నిర్వహించే రాజీవ్ గాంధీ ఫౌండేషన్ కూడా చైనా నుంచి డబ్బు పొందిందన్నారు. ఈ నేపథ్యంలో నిరసనలు చేస్తున్న విద్యార్థుల్లో దేశద్రోహ శక్తులు ఉన్నాయని, వారు టూల్‌కిట్‌లు వాడుతూ ముఖాలు కప్పుకుంటున్నారని విమర్శించారు.

భారత్‌ను దెబ్బతీయడానికి చైనా, అమెరికాలు కాంగ్రెస్ ద్వారా ప్రయత్నిస్తున్నాయని పట్టాభి రామ్ అన్నారు. "భారత్ స్వతంత్రమైన, బలమైన దేశం. ప్రపంచ దేశాలు మన ప్రధాని మోదీని ప్రశంసిస్తున్నాయి. అమెరికా ఒత్తిళ్లకు మేం లొంగలేదు. అందుకే డబ్బు తీసుకున్న పార్టీలను వాడుకుంటున్నారు" అని ఆయన వివరించారు. నిరసనల్లో 'రెజీం చేంజ్' ప్రయత్నం జరుగుతోందని, అది విఫలమవుతుందని అంచనా వేశారు. టూల్‌కిట్ వ్యవహారాన్ని బయటపెట్టినందుకు యాంకర్ అర్నబ్ గోస్వామికి కృతజ్ఞతలు తెలిపారు.