తిరుపతి జిల్లా నల్లపురెడ్డిపల్లిలో TDP, YSRCP వర్గాల ఘర్షణ

తిరుపతి జిల్లా పెనగలూరు మండలంలోని నల్లపురెడ్డిపల్లి గ్రామంలో TDP, YSRCP వర్గాల మధ్య ఘర్షణ చోటు చేసుకుంది.

ఇరు వర్గాలు ఒకరిపై ఒకరు రాళ్లు విసురుకున్నట్టు సమాచారం. ఈ ఘర్షణలో పలువురు గాయపడినట్టు తెలుస్తోంది. సమాచారం అందుకున్న పోలీసులు ఘటనా స్థలానికి చేరుకుని ఇరు వర్గాలను చెదరగొట్టారు.

ఘటనకు సుమారు ఆరు గంటల ముందే ఇరు పార్టీల కార్యకర్తల మధ్య రాళ్ల దాడి జరిగింది. అప్పుడు కూడా పోలీసులు వచ్చి వారిని చెదరగొట్టారు. ఈ ఘటనపై కేసు నమోదు చేశామని, దర్యాప్తు జరుగుతుందని పోలీసులు తెలిపారు.

కాగా, పెట్రోల్ బాంబులతో దాడులు జరిగినట్టు సోషల్ మీడియాలో వార్తలు వచ్చాయి. గ్రామంలో పెట్రోల్ బాంబు దాడికి ఆనవాళ్లు లేవని రేణిగుంట DSP శ్రీనివాసరావు తెలిపారు. ఇతర మారణాయుధాలకు సంబంధించిన ఆధారాలు కూడా కనిపించలేదని ఆయన చెప్పారు. గ్రామస్థులతో మాట్లాడి ఈ అంశాన్ని దర్యాప్తులో భాగంగా పరిశీలిస్తామని DSP పేర్కొన్నారు.

ఘర్షణకు కారణమైన వారిని గుర్తించి కేసులు నమోదు చేస్తున్నట్టు శ్రీనివాసరావు తెలిపారు. ప్రస్తుతం గ్రామంలో పరిస్థితిని ఆయనే సమీక్షిస్తున్నారు.