పాఠశాల గ్రాంట్ల స్లాబ్ విధానం రద్దు చేయాలని ఉపాధ్యాయుల డిమాండ్

ప్రభుత్వ పాఠశాలలకు ఇచ్చే గ్రాంట్లలో అమలవుతున్న స్లాబ్ విధానాన్ని రద్దు చేయాలని ఉపాధ్యాయ సంఘాల నేతలు డిమాండ్ చేస్తున్నారు. విద్యార్థుల సంఖ్య పెరిగే కొద్దీ తలసరి నిధులు తగ్గిపోతున్నాయని వారు చెప్తున్నారు.

ప్రస్తుతం ఒకటి నుంచి 30 మంది విద్యార్థులున్న స్కూల్‌కు ₹10,000 ఇస్తున్నారు. 31 నుంచి 100 మందికి ₹25,000, 101 నుంచి 250 మందికి ₹50,000 ఇస్తున్నారు. 251 నుంచి 1,000 మంది విద్యార్థులు ఉన్న స్కూల్‌కు ₹75,000, 1,000 దాటితే ₹1,00,000 గ్రాంట్ ఇస్తున్నారు. ఈ లెక్క ప్రకారం విద్యార్థికి అందే మొత్తంలో పెద్ద తేడా వస్తోంది. 100 మంది విద్యార్థులున్న స్కూల్‌కు ₹25,000 ఇస్తే ఒక్కో విద్యార్థికి ₹250 మాత్రమే వస్తుంది. 1,000 మంది ఉన్న హై స్కూల్‌కు ₹75,000 ఇస్తే ఒక్కో విద్యార్థికి ₹75కే పరిమితమవుతుంది.

హై స్కూల్‌లలో టాయిలెట్ క్లీనింగ్, కరెంట్ బిల్లులు, మరమ్మతులు, చాక్ పీస్‌లు, రిజిస్టర్లకు నెలకు ₹10,000 నుంచి ₹15,000 ఖర్చవుతోంది. దాంతో ₹75,000 గ్రాంట్ నాలుగైదు నెలలకే ఖర్చయిపోతోంది. మిగిలిన కాలంలో స్కూల్ నడపడానికి హెచ్‌ఎంలు, టీచర్లు తమ జేబుల నుంచి డబ్బు పెట్టుకోవాల్సి వస్తోంది. లేదా దాతల కోసం వెతకాల్సి వస్తోంది.

నిధులు లేక పారిశుద్య కార్మికులకు జీతాలు ఇవ్వలేక చాలా చోట్ల టాయిలెట్ల శుభ్రత దెబ్బతింటోందని టీచర్లు చెప్తున్నారు. నిధులు సరైన సమయానికి విడుదల కావడం లేదని కూడా వారు పేర్కొంటున్నారు. సమగ్ర శిక్ష కింద ఇచ్చే గ్రాంట్ల పంపిణీలో గందరగోళం ఉందని ఉపాధ్యాయులు అంటున్నారు.

ప్రతి స్కూల్‌కు కనీసం ₹10,000 కేటాయించి, ఆపై పెరిగే ప్రతి విద్యార్థికి నిర్దిష్ట మొత్తం ఇవ్వాలని ఉపాధ్యాయ సంఘాల నేతలు కోరుతున్నారు. పర్ చైల్డ్ రేషియో ప్రకారం గ్రాంట్లు ఇవ్వాలని, నిధుల వినియోగంలో ప్రధానోపాధ్యాయుడికి పూర్తి స్వేచ్ఛ ఇవ్వాలని వారు సూచిస్తున్నారు. ఈ డిమాండ్‌పై విద్యాశాఖ స్పందన తెలియాల్సి ఉంది.