వ్యవసాయ వర్సిటీలో ఉద్రిక్తత: మహిళా కమిషన్‌పై ప్రొఫెసర్ ఆగ్రహం

ప్రొఫెసర్ జయశంకర్ వ్యవసాయ విశ్వవిద్యాలయంలో మహిళా ప్రొఫెసర్ ఒకరు మహిళా కమిషన్ నిర్ణయంపై ఆగ్రహం వ్యక్తం చేశారు. పూర్తి స్థాయి విచారణ చేపట్టకుండానే కమిషన్ ప్రకటన విడుదల చేయడాన్ని ఆమె తప్పుపట్టారు.

తాను మహిళా కమిషన్‌కు ఎలాంటి ఫిర్యాదు చేయలేదని ఆమె స్పష్టం చేశారు. ఫిర్యాదు చేసింది ఎవరో చెప్పాలని డిమాండ్ చేశారు. తాను పేర్లు చెప్పిన వారిని కనీసం ఫోన్‌లో అయినా సంప్రదించి ఉండాల్సిందని ఆమె అన్నారు. ఎలాంటి ఆధారాలు పరిశీలించకుండా, విచారణ చేపట్టకుండా పత్రికలకు ప్రకటన ఎందుకు ఇచ్చారని ఆమె ప్రశ్నించారు. పూర్తి విచారణకు సుమారు 15 రోజులు పడుతుందని ఆమె తెలిపారు. తాను ఎవరిపైనా అవసరం లేకుండా ఆరోపణలు చేయనని కూడా ఆమె పేర్కొన్నారు.

ఈ నేపథ్యంలో విశ్వవిద్యాలయంలో ఆందోళన తీవ్రరూపం దాల్చింది. బాధిత ప్రొఫెసర్‌కు మద్దతుగా విద్యార్థులు చేపట్టిన దీక్ష ఆరో రోజుకు చేరుకుంది. దీక్షలో పాల్గొనేందుకు వస్తున్న విద్యార్థులతో పాటు ముగ్గురు ఉపాధ్యాయులతో కలిపి మొత్తం తొమ్మిది మందిని పోలీసులు ముందస్తుగా అరెస్టు చేశారు. వారిని కాంచన్‌బాగ్ పోలీస్ స్టేషన్‌కు తరలించారు.

పోలీసుల చర్యను నిరసిస్తూ ఫైనల్ ఇయర్ విద్యార్థులు తరగతులను బహిష్కరించి ఆందోళన చేపట్టారు.