పార్లమెంట్ తరహాలో తెలంగాణ అసెంబ్లీ పునర్నిర్మాణం

తెలంగాణ అసెంబ్లీ భవనాన్ని పార్లమెంట్ తరహాలో తీర్చిదిద్దేందుకు ప్రభుత్వం పనులు వేగవంతం చేసింది. రాబోయే అసెంబ్లీ సమావేశాల నాటికి లోపల మార్పులు పూర్తి చేయాలని లక్ష్యంగా పెట్టుకున్నారు.

మంత్రుల చాంబర్ల పునర్వ్యవస్థీకరణ, పార్లమెంట్ సెంట్రల్ హాల్ మాదిరి వేదిక ఏర్పాటు, ఆధునిక సదుపాయాలు, భద్రతా ప్రమాణాల మెరుగుదల వంటి పనులు కొనసాగుతున్నాయి. పార్లమెంట్ సెంట్రల్ హాల్ మాదిరిగా అసెంబ్లీ, శాసన మండలి సభ్యులు కలిసి సమావేశమయ్యే ప్రత్యేక వేదిక ఏర్పాటును కూడా పరిశీలిస్తున్నారు.

ఇప్పటికే అసెంబ్లీ పక్కనే ఉన్న హెరిటేజ్ భవనాన్ని ఆధునీకరించి శాసన మండలిగా మార్చారు. రెండు సభలూ ఒకే ప్రాంగణంలో ఉండడంతో శాసన వ్యవహారాల నిర్వహణ మరింత సమన్వయంగా సాగుతుందని ప్రభుత్వం భావిస్తోంది.

అసెంబ్లీ ప్రాంగణంలో మీడియా సంచరణను క్రమబద్ధీకరించే అంశాన్ని కూడా ప్రభుత్వం పరిశీలిస్తోంది. మంత్రుల చాంబర్లలోకి మీడియా తరచు వెళుతుండడంపై పలువురు మంత్రులు అభ్యంతరం వ్యక్తం చేసినట్లు తెలుస్తోంది. అధికారులతో స్వేచ్ఛగా చర్చించే అవకాశం తగ్గిపోతోందని మంత్రులు ప్రభుత్వ దృష్టికి తీసుకెళ్ళారు.

ప్రత్యేక మీడియా జోన్లు ఏర్పాటు చేయడం, మంత్రుల చాంబర్ల వద్ద నియంత్రిత ప్రవేశ విధానం అమలు చేయడం వంటి అంశాలు పరిశీలనలో ఉన్నాయి. మీడియా స్వేచ్ఛకు భంగం కలగకుండా, అదే సమయంలో ప్రజా ప్రతినిధులకు అవసరమైన గోప్యత కల్పించే సమతుల్య విధానం అమలు చేయాలని ప్రభుత్వం సమాలోచనలు నిర్వహిస్తోంది.