తెలంగాణ క్యాబినెట్ కీలక నిర్ణయాలు: ఇందిరమ్మ ఇళ్లు, గోదావరి పుష్కరాలు, లైఫ్ సైన్సెస్ పాలసీకి ఆమోదం

CM రేవంత్ రెడ్డి అధ్యక్షతన జరిగిన తెలంగాణ క్యాబినెట్ సమావేశం మూడు గంటలు సాగింది. ఈ సమావేశంలో గృహనిర్మాణం, విద్య, నీటి పారుదల, పరిశ్రమల రంగాల్లో పలు కీలక నిర్ణయాలు తీసుకున్నారు.

రెండో విడతగా 2,50,000 ఇందిరమ్మ ఇళ్ల నిర్మాణానికి మంత్రివర్గం ఆమోదం తెలిపింది. ప్రతి నియోజకవర్గానికి 2,000 ఇళ్లు మంజూరు చేయాలని నిర్ణయించారు. మొదటి విడతలో సుమారు లక్ష ఇళ్ల గృహప్రవేశాలు జూన్ 2 నాటికి పూర్తవుతాయని మంత్రి పొంగులేటి ప్రకటించారు. జూన్ 1న కుమరం భీం జిల్లా కొఠారి గ్రామంలో కొలాం ఆదివాసీలకు నిర్మించిన 28 ఇళ్లను CM రేవంత్ రెడ్డి ప్రారంభించనున్నారు.

హైదరాబాద్ నగర పరిధిలో అల్పాదాయ వర్గాల కోసం లక్ష LIG ఇళ్ల నిర్మాణానికి కూడా క్యాబినెట్ ఆమోదం తెలిపింది. గుడిసెల్లో నివసిస్తున్న 15,000 కుటుంబాలకు తక్షణమే ఇందిరమ్మ ఇళ్ల మంజూరు పత్రాలు అందించాలని నిర్ణయించారు.

వచ్చే ఏడాది జరగనున్న గోదావరి పుష్కరాల ఏర్పాట్ల కోసం ₹1,000 కోట్లు మంజూరు చేశారు. తొలి విడతగా ₹300 కోట్లు విడుదల చేయాలని నిర్ణయించారు.

జూనియర్ కళాశాలల విద్యార్థులకు మధ్యాహ్న భోజనం, అల్పాహారం, పాలు అందించాలని మంత్రివర్గం ఆమోదం తెలిపింది. పాలమూరు రంగారెడ్డి ఎత్తిపోతల పథకం కింద భూసేకరణ, పునరావాసం, మౌలిక సదుపాయాల కోసం ₹587 కోట్లకు ఆమోదం లభించింది.

2030 నాటికి తెలంగాణను ప్రపంచ టాప్ ఫైవ్ life sciences hub లలో ఒకటిగా తీర్చిదిద్దే లక్ష్యంతో Next Generation Life Sciences Policy 2026-30 కు కూడా మంత్రివర్గం ఆమోదం తెలిపింది. ఐదేళ్లలో 5 లక్షల ఉద్యోగాలు సృష్టించడం, $25 బిలియన్ పెట్టుబడులు ఆకర్షించడం లక్ష్యంగా ప్రభుత్వం నిర్దేశించుకుంది.