తెలంగాణ క్యాబినెట్ భేటీ: ఇందిరమ్మ ఇళ్లు, ఆసరా పెన్షన్లపై కీలక నిర్ణయాలు

తెలంగాణ ముఖ్యమంత్రి రేవంత్ రెడ్డి అధ్యక్షతన నేడు సాయంత్రం నాలుగు గంటలకు సచివాలయంలో క్యాబినెట్ సమావేశం జరగనుంది. సుమారు 15 అంశాలపై మంత్రివర్గం చర్చించనుంది.

ఇందిరమ్మ కుటుంబ జీవిత బీమా పథకం విధి విధానాలు క్యాబినెట్ ఖరారు చేయనుంది. కుటుంబ యజమాని మరణిస్తే ₹5 లక్షల పరిహారం అందే విధంగా ఈ పథకం రూపొందించారు. జూన్ 2న పథకాన్ని అధికారికంగా ప్రారంభించనున్నారు. ఈ పథకానికి ఈ సంవత్సరం బడ్జెట్లో ₹4,000 కోట్లు కేటాయించారు.

ఇందిరమ్మ ఇళ్ల పథకం రెండో విడతకు క్యాబినెట్ ఆమోదం తెలిపే అవకాశం ఉంది. తొలి విడతలో నియోజకవర్గానికి 3,500 ఇళ్లు మంజూరు చేశారు. రెండో విడతలో కేటాయింపు సంఖ్య, అర్హతల్లో మార్పులపై క్యాబినెట్ చర్చించనుంది. జూన్ 2న కుమురం భీం ఆసిఫాబాద్ జిల్లాలో సీఎం రేవంత్ రెండో విడత ఇళ్ల పంపిణీ ప్రారంభించనున్నారు.

రాష్ట్రవ్యాప్తంగా కొత్తగా 2 లక్షల మందికి ఆసరా పెన్షన్లు మంజూరు చేయనున్నట్లు సమాచారం. జూన్ 2 నుంచి ఈ పెన్షన్లు పంపిణీ చేయనున్నారు. ప్రస్తుతం 42 లక్షల మంది పెన్షన్లు పొందుతుండగా, మరో 10 లక్షల మంది దరఖాస్తు చేసి నిరీక్షిస్తున్నారు.

భూముల మార్కెట్ విలువల సవరణకు కూడా క్యాబినెట్ ఆమోదం తెలపనుంది. భూముల రిజిస్ట్రేషన్ విలువ 5 నుంచి 100% వరకు పెంచే ప్రతిపాదన ఉంది. ORR లోపల ఎకరానికి కనీసం ₹15 లక్షలుగా నిర్ణయించారు. ఈ నెల 28 నుంచి సవరించిన విలువలు అమలులోకి వస్తాయని ప్రభుత్వం భావిస్తోంది.

Future City లో ప్రజా ప్రతినిధులు, civil services అధికారులు, జర్నలిస్టులకు 500 ఎకరాల్లో ఇళ్ల స్థలాలు కేటాయించే ప్రతిపాదనపై నేడు స్పష్టత వచ్చే అవకాశం ఉంది. ప్రైవేట్ స్కూళ్లలో ఫీజుల నియంత్రణ, ధాన్యం సేకరణ, కాళేశ్వరం ప్రాజెక్ట్ బ్యారేజీల మరమ్మత్తులు, దేవాదుల, పాలమూరు-రంగారెడ్డి ఇరిగేషన్ ప్రాజెక్టులు, HAM రోడ్లు వంటి అంశాలపై కూడా చర్చ జరగనుంది.