తెలంగాణ క్యాబినెట్ సమావేశం: తేదీపై సందిగ్ధత — సరస్వతి పుష్కరాలు కారణం

తెలంగాణ క్యాబినెట్ సమావేశం ఈ నెల 21న జరుగుతుందని అధికారికంగా సర్క్యులర్ జారీ అయింది. అయితే అదే రోజు సరస్వతి నది అంత్య పుష్కరాలు కూడా ప్రారంభమవుతున్నాయి.

పుష్కరాలకు రాష్ట్ర గవర్నర్, CM రేవంత్ రెడ్డి, మంత్రులందరూ హాజరవుతారని దేవాదాయ శాఖ ఆహ్వానాలు పంపింది. చాలా మంది మంత్రులు పుష్కరాల ఏర్పాట్లలో నిమగ్నమయ్యారు. దీంతో 21న క్యాబినెట్ సమావేశం నిర్వహించాలా వద్దా అనే సందిగ్ధత నెలకొంది.

సరస్వతి అంత్య పుష్కరాలు కాళేశ్వరం వద్ద జరుగుతాయి. గోదావరి నదిలో అంతర్భాగంగా సరస్వతి నది అక్కడ ప్రవహిస్తుందని చెప్తారు.

ప్రభుత్వం ఇంకా అధికారికంగా క్యాబినెట్ వాయిదా నిర్ణయం తీసుకోలేదు. అధికార వర్గాల ప్రకారం, 21 బదులు 23వ తేదీన యాదాద్రి గుట్ట దగ్గర క్యాబినెట్ భేటీ నిర్వహించే అవకాశం ఉంది. ఆ సమావేశంలో యాదాద్రి ఆలయ అభివృద్ధిపై చర్చ జరుగుతుందని, CM రేవంత్ రెడ్డి కీలక ప్రకటనలు చేసే అవకాశం ఉందని తెలుస్తోంది.

ప్రభుత్వం అధికారిక నిర్ణయం ప్రకటించేవరకు సమావేశం తేదీపై అస్పష్టత కొనసాగుతోంది.