బియ్యం ధరల పెంపుపై తెలంగాణ సివిల్ సప్లై చర్యలు.. హైదరాబాద్‌లో 10 ప్రత్యేక కౌంటర్లు

హైదరాబాద్‌లో బియ్యం ధరలు పెరుగుతున్న నేపథ్యంలో సరసమైన ధరలకే బియ్యం అందించేందుకు తెలంగాణ పౌర సరఫరాల శాఖ ప్రత్యేక కౌంటర్లు ఏర్పాటు చేసింది. హైదరాబాద్ జిల్లా వ్యాప్తంగా 10 ప్రత్యేక కౌంటర్లను తెరుస్తున్నట్లు జిల్లా సివిల్ సప్లై అధికారి తెలిపారు.

ప్రభుత్వ ఆదేశాల ప్రకారం హోల్‌సేలర్లు, రీటైలర్లు, సూపర్ మార్కెట్లలో గరిష్ఠ ధరలు నిర్ణయించారు. సోనా మసూరి HMNT కిలో ₹79, తెలంగాణ సోనా RNR కిలో ₹74, BPT కిలో ₹66 ధరకే బియ్యం అమ్మాలని ఆదేశించారు. ప్రజలు తెలుసుకునేలా దుకాణాల్లో ధరల పట్టికలు ఏర్పాటు చేశారు.

మలక్‌పేట సర్కిల్‌లో ట్రేడర్ యోగేష్ ఆధ్వర్యంలో ప్రత్యేక కౌంటర్ ప్రారంభించారు. ఈ కౌంటర్‌లో BPT, RNR, తెలంగాణ సోనా, HMNT, జై శ్రీరామ్ వంటి రకాల బియ్యం అందుబాటులో ఉన్నాయి. హైదరాబాద్ నగరానికి మిర్యాలగూడ, నిజామాబాద్ వంటి పంట సేకరణ జిల్లాల నుంచి బియ్యం వస్తుందని అధికారులు తెలిపారు.

గతంలో కొందరు ట్రేడర్లు రేషన్ బియ్యాన్ని మార్చి అమ్మిన ఘటనల నేపథ్యంలో సివిల్ సప్లై, విజిలెన్స్ అధికారులు దాడులు చేశారు. నిల్వలు, నాణ్యతను రోజూ పర్యవేక్షిస్తున్నామని అధికారులు తెలిపారు. ఎవరైనా అధిక ధరలకు బియ్యం అమ్మితే హైదరాబాద్ జిల్లా వ్యాప్తంగా వెంటనే ఫిర్యాదు చేయవచ్చని పేర్కొన్నారు.