తెలంగాణలో కాంట్రాక్ట్, ఔట్ సోర్సింగ్ ఉద్యోగులకు ప్రతి నెల 1న జీతం – సీఎం రేవంత్ రెడ్డి ఆదేశం

తెలంగాణలో కాంట్రాక్ట్, ఔట్ సోర్సింగ్ ఉద్యోగులకు ప్రతి నెల 1వ తేదీనే జీతం చెల్లించాలని ముఖ్యమంత్రి రేవంత్ రెడ్డి ఆదేశించారు. ఇప్పటి వరకు వీరికి జీతాలు ఆలస్యంగా అందేవి. ఈ పరిస్థితిని సరిదిద్దేందుకు, ప్రభుత్వ ఉద్యోగులతో పాటు కాంట్రాక్ట్, ఔట్ సోర్సింగ్ సిబ్బందికీ నెల మొదటి తేదీనే జీతం అందేలా చూడాలని ఎంసీఆర్ హెచ్ఆర్డీ ఇనిస్టిట్యూట్లో జరిగిన సమీక్ష సమావేశంలో సీఎం అధికారులను ఆదేశించారు.

అదే సమావేశంలో డిజిటల్ గవర్నెన్స్ దిశగా చర్యలు చేపట్టాలని ఆయన సూచించారు. ప్రభుత్వ పాలనను పూర్తిగా డిజిటలైజ్ చేయాలని, ప్రజలకు మెరుగైన సేవలు, ప్రత్యక్ష లబ్ధి చేకూర్చే వ్యవస్థను తీసుకురావాలని ఆదేశించారు. ఈ అంశంపై అధ్యయనం చేసేందుకు ఒక ప్రత్యేక కమిటీని ఏర్పాటు చేయాలని, 100 రోజుల్లో నివేదిక ఇవ్వాలని తెలిపారు. అవసరమైన చట్టాలు రూపొందించాలని కూడా సీఎం చెప్పారు.

రాష్ట్రంలో దాదాపు 4800 కాంట్రాక్ట్, ఔట్ సోర్సింగ్ ఏజెన్సీలు ఉండగా, వాటిలో 4300 ఏజెన్సీలు ఉద్యోగుల ఈఎస్ఐ చెల్లించడం లేదని అధికారులు గుర్తించారు. జీతాలు కూడా సకాలంలో అందడం లేదని సీఎం దృష్టికి తెచ్చారు. దీంతో అటువంటి ఏజెన్సీలపై కఠిన చర్యలు తీసుకోవాలని రేవంత్ రెడ్డి ఆదేశించారు. డిజిటల్ గవర్నెన్స్ ద్వారా ప్రతి నెల 1 నుండి 5 తేదీల్లోపు పారదర్శకంగా జీతాలు చెల్లించే విధానాన్ని తీసుకురావాలని సూచించారు.