తెలంగాణలో మహిళలు, చిన్నారులపై నేరాలు పెరిగినట్లు NCRB నివేదిక

2024 సంవత్సరానికి సంబంధించిన నేషనల్ క్రైమ్ రికార్డ్స్ బ్యూరో (NCRB) నివేదిక ప్రకారం తెలంగాణలో మహిళలు, చిన్నారులపై నేరాలు గతంతో పోలిస్తే పెరిగాయి. రాష్ట్రంలో మహిళలపై 24,495 కేసులు నమోదయ్యాయి. ప్రతి లక్ష మంది మహిళలకు 128.6 మంది నేర బాధితులుగా ఉన్నారు. దేశంలోనే మానవ అక్రమ రవాణాలో తెలంగాణ మొదటి స్థానంలో నిలిచింది. మొత్తం దేశంలో నమోదైన కేసుల్లో 20 శాతం తెలంగాణలోనే ఉన్నాయి.

మిస్సింగ్ కేసుల్లోనూ తెలంగాణ ముందు వరుసలో ఉంది. 2024లో 2,554 మిస్సింగ్ ఫిర్యాదులు నమోదుకాగా, 4,614 మంది ఆచూకీ ఇంకా దొరకలేదు. దేశవ్యాప్తంగా తీవ్రమైన నేరాల్లో తెలంగాణ మూడో స్థానంలో నిలిచింది. మొత్తం నేరాల రేటులో ఐదో స్థానంలో ఉంది.

చిన్నారులపై లైంగిక దాడుల విషయంలో రాష్ట్రం టాప్ 5లో ఉంది. 2024లో POCSO కింద 2,103 కేసులు నమోదయ్యాయి. ఇది జాతీయ సగటు 9% కంటే చాలా ఎక్కువగా 15%గా ఉంది. 2023తో పోలిస్తే POCSO కేసులు 18.88% పెరిగాయి. రాష్ట్రంలో రోజుకు సగటున ఆరుగురు చిన్నారులు అత్యాచారానికి గురవుతున్నారు. 2025 పోలీస్ నివేదిక ప్రకారం రోజుకు 8 పైగా POCSO కేసులపై ఎఫ్ఐఆర్లు నమోదవుతున్నాయి. 2025లో ఇప్పటివరకు 819 మంది చిన్నారులు లైంగిక దాడికి గురయ్యారు. 2,570 మందిపై లైంగిక వేధింపులు నమోదయ్యాయి.

రాష్ట్రంలో హత్యలు కూడా పెరిగాయి. 2024లో మొత్తం 1,040 హత్యలు నమోదయ్యాయి. నడిరోడ్లపై హత్యలు, తీవ్రమైన దాడులు, దోపిడీలు వంటి నేరాలు పెరిగినట్లు నివేదికలు చెబుతున్నాయి.