తెలంగాణ థియేటర్లకు రెంటల్ సిస్టం వద్దు: ఎగ్జిబిటర్స్ డిమాండ్

తెలంగాణ ఎగ్జిబిటర్స్ అసోసియేషన్ అధ్యక్షుడు విజయేందర్ రెడ్డి రెంటల్ సిస్టంపై తీవ్ర అసంతృప్తి వ్యక్తం చేశారు. కర్ణాటక, కేరళ, తమిళనాడు, మహారాష్ట్ర సహా దేశవ్యాప్తంగా పర్సెంటేజ్ విధానం అమలవుతోందని ఆయన పేర్కొన్నారు. ఆంధ్రప్రదేశ్‌లో సింగిల్ థియేటర్లకు పర్సెంటేజ్ పద్ధతి పాటిస్తున్నారని, తెలంగాణలో మాత్రం అమలు కావట్లేదని ఆయన అన్నారు.

తెలంగాణలో సింగిల్ స్క్రీన్ థియేటర్లకు పర్సెంటేజ్ వ్యవస్థ వర్తించడం లేదని, మల్టీప్లెక్స్‌లకు మాత్రం వర్తిస్తోందని విజయేందర్ రెడ్డి అన్నారు. మల్టీప్లెక్స్ ఒక సినిమాకు కోటిన్నర కలెక్షన్ వస్తే ₹75 లక్షలు తీసుకుంటున్నారని, సింగిల్ థియేటర్‌కు అదే సినిమాపై ₹7 లక్షలు మాత్రమే వస్తోందని ఆయన పేర్కొన్నారు.

తెలంగాణలో సుమారు 250 సింగిల్ స్క్రీన్ థియేటర్లు ఉన్నాయని, వాటన్నిటికీ ఇదే సమస్య ఉందని ఆయన వివరించారు. 2008 నుంచి ఈ సమస్య కొనసాగుతోందని అన్నారు. పర్సెంటేజ్ విధానం వెంటనే అమలు చేయకపోతే థియేటర్లు మూసివేయాల్సి వస్తుందని హెచ్చరించారు.

ఈ సమావేశంలో అసోసియేషన్ సెక్రెటరీ శ్రీధర్ బాలగోవింద్ రాజ్ సహా పలువురు ఎగ్జిబిటర్లు పాల్గొన్నారు. నిర్మాతలు, తెలుగు ఫిలిం చాంబర్‌తో చర్చలు జరిపినా ఇంతవరకు పరిష్కారం రాలేదని వారు తెలిపారు. త్వరలో విడుదల కానున్న చిత్రాలకు కూడా ఇదే సమస్య వర్తిస్తుందని ఆందోళన వ్యక్తం చేశారు.

ఈ విషయంపై నిర్మాతలు మరియు తెలుగు ఫిలిం చాంబర్ స్పందన తెలియాల్సి ఉంది.