తెలంగాణలో అగ్ని ప్రమాదాలు: రైతులకు భారీ పంట నష్టం

తెలంగాణలో పలు జిల్లాల్లో అగ్ని ప్రమాదాలు రైతులకు భారీ నష్టం కలిగిస్తున్నాయి. వరికొయ్యలకు పెట్టిన నిప్పు గాలులతో వేగంగా పక్క పొలాలకు వ్యాపిస్తోంది. ధాన్యపు బస్తాలు, వడ్లకుప్పలు, గడ్డి కుప్పలు కాలిపోతున్నాయి.

కరీంనగర్ జిల్లా సైదాపూర్ మండలం ఆగ్రారం, సోమారం, సైదాపూర్ గ్రామాల్లో వరిపొలాల్లో మంటలు వ్యాపించాయి. రైతులు అగ్నిమాపక సిబ్బందికి సమాచారం అందించగా, వారు సకాలంలో వచ్చి మంటలు అదుపులోకి తెచ్చారు. ప్రమాద సమయంలో వరికొయ్యలకు కట్టిన ఆవులను స్థానికులు సురక్షితంగా తప్పించారు.

మహబూబాబాద్ జిల్లా గార్ల మండలం మర్రిగూడెం గ్రామంలో రెండు ఎకరాల వరి గడ్డివాము పూర్తిగా కాలిపోయింది. పక్కనున్న కలపకు కూడా మంటలు అంటుకున్నాయి. ఈ ప్రమాదంలో సుమారు ₹50,000 ఆస్తి నష్టం జరిగిందని బాధిత రైతు తెలిపారు. నష్టపోయిన రైతులకు ప్రభుత్వం పరిహారం అందించాలని ఆ రైతు కోరారు.

భూపాలపల్లి జిల్లా మహాదేవపూర్ మండలంలోని అంబట్పల్లిలో L&T కంపెనీ camp కార్యాలయానికి మంటలు అంటుకున్నాయి. ఆఫీస్ పూర్తిగా కాలిపోయింది. మేడిగడ్డ లక్ష్మీ బ్యారేజ్ నిర్మాణంలో పాల్గొన్న సంస్థది ఈ కార్యాలయం. కార్యాలయానికి ప్రక్కనే ఉన్న పొలంలో రైతు వరికొయ్యలకు పెట్టిన నిప్పు అంటుకున్నట్లు అనుమానం వ్యక్తమవుతోంది.

ఈత, తాటివనాలు కాలిపోవడంతో గౌడ కులస్తులు తమ ఉపాధి కోల్పోతున్నారని బాధితులు తెలిపారు. అధిక ఉష్ణోగ్రతలు నమోదవుతున్న ఈ వేసవిలో మంటలు వేగంగా వ్యాపిస్తున్నాయని అధికారులు హెచ్చరిస్తున్నారు. వరికొయ్యలకు నిప్పు పెట్టొద్దని అధికారులు రైతులకు సూచిస్తున్నారు.