తెలంగాణ వ్యవసాయానికి బీహార్, UP వలస కూలీలే ఆధారం

తెలంగాణలో వ్యవసాయం చేయాలంటే బీహార్, ఉత్తరప్రదేశ్, బెంగాల్ నుండి వలస కూలీలు రాకుండా కుదరడం లేదని రైతులు చెప్తున్నారు. నాట్లు వేయడం మొదలుకొని ధాన్యం లోడింగ్ చేసే వరకు దాదాపు అన్ని పనులూ వీళ్ళే చేస్తున్నారు.

ఇటీవల బెంగాల్ ఎన్నికల కారణంగా అక్కడి కూలీలు రాలేదని, బీహార్‌లో స్థానికంగా పని దొరికిందని కొందరు రాలేదని రైతులు చెప్పారు. దీంతో కళ్ళాలకు హమాలీలు దొరకడం లేదు. బస్తాలు నింపడం, లారీల్లో ఎక్కించడం వంటి పనులకు మనుషులే కనిపించడం లేదని రైతులు అంటున్నారు.

స్థానిక యువత వ్యవసాయ పనులు చేయడం మానేసి వేరే ఉద్యోగాలు వెతుక్కుంటున్నారు. పెద్దవారికి ఒంట్లో ఓపిక లేకుండా అయింది. దాంతో వలస కూలీలపై ఆధారపడటం మరింత పెరిగింది.

ఒకప్పుడు 100 కిలోల బస్తాలు ఉండేవి. ఇప్పుడు 40 కిలోల బస్తాలైనా ఎత్తేందుకు కూలీలు వందలు డిమాండ్ చేస్తున్నారని, అదే బీహార్ కూలీలు అయితే వేగంగా పని పూర్తి చేస్తారని పాత హమాలీలు చెప్తున్నారు. ఈ తరంతో వ్యవసాయం చేసే వారు తగ్గిపోతున్నారని వృద్ధ రైతులు ఆందోళన వ్యక్తం చేస్తున్నారు.