నేషనల్ ఆయిల్ పామ్ మిషన్‌లో తెలంగాణ దేశంలో మొదటి స్థానం — మంత్రి తుమ్మల

కేంద్రం అమలు చేస్తున్న నేషనల్ మిషన్ ఆన్ ఎడిబుల్ ఆయిల్స్ — ఆయిల్ పామ్ కార్యక్రమంలో తెలంగాణ దేశంలో మొదటి స్థానం సాధించిందని వ్యవసాయ శాఖ మంత్రి తుమ్మల తెలిపారు.

ప్రస్తుతం రాష్ట్రంలో 1.16 లక్షల హెక్టార్లలో ఆయిల్ పామ్ సాగు జరుగుతోంది. 79,448 మంది రైతులు ఈ పంటను పండిస్తున్నారు. ఒకసారి తోట వేస్తే దాదాపు 30 సంవత్సరాల పాటు దిగుబడి వస్తుందని మంత్రి చెప్పారు. ఎకరాకు సంవత్సరానికి ₹1 లక్ష నుంచి ₹3 లక్షల వరకు ఆదాయం పొందే అవకాశం ఉందని వివరించారు.

ఆయిల్ పామ్ కంపెనీలు నేరుగా రైతుల దగ్గర ఫ్రెష్ ఫ్రూట్ బంచులను కొనుగోలు చేస్తున్నాయి. దీంతో మధ్యవర్తులు లేకుండా రైతులకు గిట్టుబాటు ధర లభిస్తోంది. ప్రస్తుతం ఆయిల్ పామ్ గెలల ధర టన్నుకు ₹23,501 గా ఉంది.

డ్రిప్ ఇరిగేషన్ వ్యవస్థకు సబ్సిడీ, మొదటి నాలుగు సంవత్సరాల పాటు తోటల నిర్వహణకు ఆర్థిక సహాయం, వ్యవసాయ యాంత్రీకరణ పథకం ద్వారా పనిముట్లు సబ్సిడీపై అందిస్తున్నారు. నాణ్యమైన మొక్కలు కూడా సరఫరా చేస్తున్నారని మంత్రి తెలిపారు.

ప్రస్తుతం రాష్ట్రంలో మూడు ఆయిల్ పామ్ ప్రాసెసింగ్ మిల్లులు పని చేస్తున్నాయి. భద్రాద్రి కొత్తగూడెం జిల్లాలో రెండు, సిద్దిపేట జిల్లాలో ఒకటి ఉన్నాయి. వీటి గంటకు ప్రాసెసింగ్ సామర్థ్యం 150 మెట్రిక్ టన్నులు. మరో ఏడు మిల్లులు నిర్మాణ దశలో ఉన్నాయి.

వంట నూనె దిగుమతులపై ఆధారాన్ని తగ్గించేందుకు కేంద్ర, రాష్ట్ర ప్రభుత్వాలు పని చేస్తున్నాయి. గతంలో ఉన్న 44 శాతం దిగుమతి సుంకాన్ని కేంద్రం పునరుద్ధరిస్తే ఆయిల్ పామ్ రైతులకు మరింత మేలు జరుగుతుందని మంత్రి తుమ్మల పేర్కొన్నారు.