తెలంగాణ ఆవిర్భావ దినోత్సవం: సికింద్రాబాద్ పరేడ్ గ్రౌండ్స్‌లో ఏర్పాట్లు; సీఎం రేవంత్ రెడ్డి జెండా ఆవిష్కరణ

తెలంగాణ ఆవిర్భావ దినోత్సవ వేడుకలు జూన్ 2న సికింద్రాబాద్ పరేడ్ గ్రౌండ్స్‌లో జరగనున్నాయి. సుమారు 70 నుంచి 80% ఏర్పాట్లు ఇప్పటికే పూర్తయ్యాయని అధికారులు తెలిపారు.

ముఖ్యమంత్రి రేవంత్ రెడ్డి గేట్ నంబర్ 6 నుంచి లోనికి వచ్చి జెండా ఆవిష్కరణ చేస్తారు. ప్రధాన వేదిక నుంచి ఆయన సంబోధన చేస్తారు. గౌరవ వందనం కోసం ఓపెన్ టాప్ జీప్ ట్రాక్ కూడా సిద్ధమైంది. కాకతీయ కళాతోరణం ప్రత్యేక ఆకర్షణగా నిలుస్తుంది.

వేడుకలకు సుమారు 4,000 స్వయం సహాయక సంఘాల మహిళలు హాజరవుతారు. తెలంగాణ సంస్కృతి, సంప్రదాయాలు ప్రతిబింబించేలా జానపద కళారూపాల ప్రదర్శన ఉంటుంది. ఈ కార్యక్రమాల కోసం కళాకారులు ఇప్పటికే హైదరాబాద్ చేరుకుంటున్నారు.

రాష్ట్రవ్యాప్తంగా జిల్లాల్లో మంత్రులు వేడుకల్లో పాల్గొంటారు. పొంగులేటి శ్రీనివాస్ రెడ్డి హనుమకొండలో, భట్టి విక్రమార్క ఖమ్మంలో, పొన్నం ప్రభాకర్ సిద్దిపేటలో, గడ్డం ప్రసాద్ వికారాబాద్‌లో పాల్గొననున్నారు. సీఎం రేవంత్ రెడ్డి హైదరాబాద్‌లో కార్యక్రమాలు నిర్వహిస్తారు.

పరేడ్ గ్రౌండ్స్ చుట్టుపక్కల ట్రాఫిక్ మార్పులు ఉంటాయని పోలీసులు సూచించారు. అన్ని చోట్లా వేసవి వేడిని తట్టుకునేందుకు ప్రత్యేక ఏర్పాట్లు చేశారు. ఇప్పటికే రెండుసార్లు రిహార్సల్స్ నిర్వహించారు.

సీఎం రేవంత్ రెడ్డి తన ప్రసంగంలో గత ఏడాది ప్రభుత్వం అమలు చేసిన సంక్షేమ, అభివృద్ధి పథకాలను వివరించడంతో పాటు రాబోయే ప్రణాళికలు, పెట్టుబడుల ఆకర్షణ, మౌలిక సదుపాయాల విస్తరణపై సంకేతాలు ఇచ్చే అవకాశం ఉంది.