ప్రభుత్వ పాఠశాలల్లో ఉచిత అల్పాహార పథకం ప్రారంభం

తెలంగాణ ప్రభుత్వం ప్రభుత్వ పాఠశాలల్లో చదివే విద్యార్థుల కోసం ఉచిత అల్పాహార పథకాన్ని ప్రారంభించింది. మంత్రి పొన్నం ప్రభాకర్ ఈ పథకాన్ని హైదరాబాద్‌లో ప్రారంభించారు. ఇవాల్టి నుంచి తొలి దశలో 8 జిల్లాల్లో 1,302 ప్రభుత్వ పాఠశాలల్లో విద్యార్థులకు వారంలో ఆరు రోజులు పౌష్టికాహారం అందించనున్నారు.

కొత్త విద్యా సంవత్సరంలో రాష్ట్రవ్యాప్తంగా 29 లక్షల మంది విద్యార్థులకు ఈ పథకం వర్తింపజేయనున్నారు. ఇందుకోసం ప్రభుత్వం ఏటా ₹720 కోట్లు ఖర్చు చేయనుంది. అల్పాహారానికి ₹540 కోట్లు, విద్యార్థులకు పాలు అందించేందుకు ₹180 కోట్లు కేటాయించారు. వారంలో మూడు రోజులు పాలతో పాటు రాగి జావా కూడా ఇవ్వనున్నారు.

తొలి విడతలో ఈ పథక నిర్వహణను హరే కృష్ణ మూవ్మెంట్ చారిటబుల్ ట్రస్ట్, మన్నా ట్రస్ట్లకు అప్పగించారు. హరే కృష్ణ ట్రస్ట్ వికారాబాద్, నారాయణపేట, సంగారెడ్డి, రంగారెడ్డి, హనుమకొండ, వరంగల్ జిల్లాల్లో 1,162 స్కూళ్లు, 21 జూనియర్ కాలేజీల్లో పథకాన్ని అమలు చేస్తుంది. మన్నా ట్రస్ట్ హైదరాబాద్, మేడ్చల్, మల్కాజిగిరి జిల్లాల్లో 107 స్కూళ్లు, 12 కళాశాలల్లో సేవలు అందిస్తుంది.

అలాగే ప్రభుత్వ జూనియర్ కాలేజీల్లో ఇంటర్మీడియట్ విద్యార్థులకు మధ్యాహ్న భోజన పథకాన్ని విస్తరిస్తున్నారు. ఈ రోజు నుంచి 33 కళాశాలల్లో ప్రారంభమైన ఈ పథకం, త్వరలో రాష్ట్రంలోని 430 కళాశాలల్లో 1.70 లక్షల మంది విద్యార్థులకు వర్తింపజేస్తారు. ఈ విస్తరణ కోసం ప్రత్యేకంగా ₹56 కోట్లు కేటాయించింది.

ప్రభుత్వ పాఠశాలల్లో విద్యార్థుల సంఖ్య పెంచేందుకు మౌలిక సదుపాయాలు, పౌష్టిక ఆహారం అందిస్తున్నామని మంత్రి పొన్నం ప్రభాకర్ తెలిపారు. తల్లిదండ్రులు, ఉపాధ్యాయుల సహకారంతో ప్రభుత్వ విద్యను ప్రోత్సహించాలని ఆయన సూచించారు.