తెలంగాణ గ్లోబల్ సమ్మిట్ కర్టెన్ రైజర్: ఢిల్లీలో ముఖ్య అతిథిగా పియూష్ గోయల్

తెలంగాణ గ్లోబల్ సమ్మిట్ కోసం ఢిల్లీలో కర్టెన్ రైజర్ కార్యక్రమం జరిగింది. ఈ కార్యక్రమానికి కేంద్ర పరిశ్రమల శాఖ మంత్రి పియూష్ గోయల్ ముఖ్య అతిథిగా హాజరయ్యారు.

2047 నాటికి 3 ట్రిలియన్ డాలర్ల ఆర్థిక లక్ష్యాన్ని తెలంగాణ ప్రభుత్వం నిర్దేశించుకుంది. ఈ లక్ష్యానికి కేంద్రం పూర్తి సహకారం అందిస్తుందని పియూష్ గోయల్ తెలిపారు. రాష్ట్రాల లక్ష్యాలే దేశ లక్ష్యాలని ఆయన అన్నారు. పెట్టుబడిదారుల కోసం దేశం తలుపులు తెరిచి ఉన్నాయని చెప్పారు.

దేశ GDPలో 10 శాతం వాటా సాధించడం తమ లక్ష్యమని ముఖ్యమంత్రి రేవంత్ రెడ్డి అన్నారు. పెట్టుబడుల విషయంలో కేంద్ర, రాష్ట్ర ప్రభుత్వాలు కలిసి పని చేస్తున్నాయని ఆయన స్పష్టం చేశారు. అభివృద్ధి ప్రయాణంలో అడ్డంకులు లేకుండా చూడటం తన బాధ్యత అని చెప్పారు. పరిశ్రమలకు ఏమి కావాలో ప్రభుత్వం సమకూరుస్తుందన్నారు.

రాష్ట్రంలో నైపుణ్యం ఉన్న యువత పెద్ద సంఖ్యలో ఉన్నారని ఐటీ శాఖ మంత్రి శ్రీధర్ బాబు అన్నారు. పరిశ్రమలకు కావాల్సిన నైపుణ్యం అందించేందుకు స్కిల్ యూనివర్సిటీ ఏర్పాటు చేసినట్లు తెలిపారు. డేటా సెంటర్లను ప్రోత్సహిస్తున్నామని, 5 గిగావాట్ల డేటా సెంటర్ సామర్థ్యం లక్ష్యమని చెప్పారు.

తెలంగాణ ఐటీ, ఫార్మా రంగాలకు కేంద్రంగా మారిందని భారత్ బయోటెక్ ఎండీ సుచిత్ర ఎల్ల అన్నారు. కంపెనీ 30 ఏళ్ల ప్రస్థానం పూర్తి చేసుకున్నట్లు ఆమె తెలిపారు. జీనోమ్ వ్యాలీలో కోవిడ్ వ్యాక్సిన్ తయారీపై గర్వం ఉందని చెప్పారు.

సమ్మిట్ డిసెంబర్ 7 నుంచి 9 వరకు మూడు రోజుల పాటు జరుగుతుంది. పెట్టుబడిదారులు, పరిశ్రమల ప్రతినిధులు హాజరుకావాల్సిందిగా ప్రభుత్వం ఆహ్వానించింది.