ప్రజాపాలన ప్రగతి ప్రణాళిక ముగింపు: 10 రోజుల భారీ కార్యక్రమాలకు తెలంగాణ ప్రభుత్వం ఏర్పాట్లు

తెలంగాణ ప్రభుత్వం ప్రజాపాలన ప్రగతి ప్రణాళిక ముగింపును పురస్కరించుకుని 10 రోజుల పాటు భారీ కార్యక్రమాలు నిర్వహిస్తోంది. ఈ నెల 12వ తేదీ వరకు శాఖల వారీగా ప్రారంభోత్సవాలు, శంకుస్థాపనలు, అవగాహన కార్యక్రమాలు జరుగుతాయి.

ఈ కార్యక్రమాల్లో ముఖ్యమంత్రి రేవంత్ రెడ్డి పాల్గొంటారు. ఫ్యూచర్ సిటీ అభివృద్ధి అథారిటీ, మల్కాజ్‌గిరి మున్సిపల్ కార్పొరేషన్ భవనం, అంతర్జాతీయ పండ్ల మార్కెట్ రిజిస్ట్రేషన్ ఆఫీసు తదితరాలకు శంకుస్థాపన చేస్తారు.

ఈ నెల 5న మహిళా సంఘాలకు 553 ఆర్టీసి బస్సులు ప్రారంభమవుతాయి. 8వ తేదీన ఆర్‌అండ్‌బి శాఖ రాష్ట్రవ్యాప్తంగా కొత్త రోడ్లు, వంతెనలు, ఫ్లైఓవర్ల నిర్మాణం చేపడుతుంది. అదే రోజు 9 జిల్లాల్లో 19 సబ్‌స్టేషన్ల వద్ద 19 మెగావాట్ల సోలార్ పవర్ ప్లాంట్లకు సీఎం శంకుస్థాపన చేస్తారు. 9న 1600 రైతు వేదికల్లో పంటల వైవిధ్యంపై రైతులకు శిక్షణ ఇస్తారు. 10న మొబైల్ అంగన్‌వాడీ కేంద్రాలను ప్రారంభిస్తారు.

11వ తేదీన సనత్‌నగర్ లో టిమ్స్ ఆసుపత్రిని సీఎం ప్రారంభిస్తారు. కొత్తగూడెం, మెదక్, నారాయణపేటలో క్రిటికల్ కేర్ బ్లాకులు, భువనగిరిలో సెంట్రల్ మెడికల్ స్టోర్, హైదరాబాద్‌లో 145 పాలీ క్లినిక్‌లు ప్రారంభం కానున్నాయి. వైద్యారోగ్య శాఖలో 572 హెల్త్‌కేర్ సిబ్బందికి, 300 అసిస్టెంట్ ప్రొఫెసర్లకు, 272 స్టాఫ్ నర్సులకు నియామక పత్రాలు ఇస్తారు.

హైదరాబాద్‌లో 304 కోట్లతో మీరాలం ట్యాంక్ బ్రిడ్జి, 280 కోట్లతో ఉస్మాన్ సాగర్ మంచినీటి ప్రాజెక్టు వంటి అనేక ప్రాజెక్టులు ప్రారంభిస్తారు. 12న విద్యార్థులకు స్వాగత కిట్లు, మాదకద్రవ్యాల వ్యతిరేక ప్రమాణం ఉంటాయి. అటవీ, పర్యావరణ శాఖలు అవగాహన కార్యక్రమాలు నిర్వహిస్తాయి.