గ్రామ పంచాయతీ అభివృద్ధి పర్యవేక్షణకు 16 మంది ప్రత్యేక అధికారుల నియామకం

తెలంగాణ ప్రభుత్వం గ్రామ పంచాయతీల అభివృద్ధి పనుల పర్యవేక్షణకు 16 మంది ప్రత్యేక అధికారులను నియమించింది. వీరికి వారానికి ఒకసారి జిల్లాల్లో పర్యటించాలని, కనీసం రెండు గ్రామ పంచాయతీలను సందర్శించి పనుల పురోగతిని సమీక్షించాలని ఆదేశించారు.

ఈ అధికారులు తాగునీటి సరఫరా, వీధి దీపాల నిర్వహణ, చెత్త సేకరణ, కంపోస్ట్ షెడ్ల నిర్వహణ, ఉపాధి హామీ పథకంలో మాస్టర్ రోల్స్ తనిఖీ, పని ప్రదేశాల్లో వసతులు, మెటీరియల్ కాంపోనెంట్ పనులను పర్యవేక్షిస్తారు. 15వ ఆర్థిక సంఘం నిధుల ఖర్చు, సిబ్బంది జీతాలు, పంచాయతీ సెక్రటరీల హాజరు, వీధి కుక్కల నియంత్రణ, సెగ్రిగేషన్ పనులు కూడా వీరి పరిధిలోకి వస్తాయి.

ప్రతి సోమవారం కమిషనర్‌కు నివేదిక సమర్పించాలి. సోషల్ ఆడిట్‌లో తేలిన అవకతవకలపై రికవరీ స్టేటస్, విజిలెన్స్ కేసుల పర్యవేక్షణ చేపట్టాలి. అత్యవసర సమస్యలు ఉంటే వెంటనే కమిషనర్ దృష్టికి తీసుకురావాలి.

ప్రతి అధికారికి రెండు నుంచి మూడు జిల్లాల చొప్పున బాధ్యతలు అప్పగించారు. వరంగల్, కరీంనగర్, నల్గొండ, మహబూబ్‌నగర్, సంగారెడ్డి, నిజామాబాద్ తదితర జిల్లాలకు అధికారులను కేటాయించారు. నియమితులైన వారిలో విద్యాలత, కే సుధాకర్, కే అనిల్ కుమార్, సురేష్ బాబు, సరిత, శ్రీనాథ్, శ్రీధర్ వంటి అధికారులు ఉన్నారు.

నిధుల దుర్వినియోగాన్ని అడ్డుకోవడం, పథకాల అమలులో పారదర్శకత తీసుకురావడం ఈ నియామకాల లక్ష్యం. ఈ అధికారులు ఇప్పటికే తమ బాధ్యతలు ప్రారంభించినట్లు సమాచారం.