తెలంగాణలో చనిపోయిన వారికీ పెన్షన్లు: 24,000 ఖాతాలు గుర్తించిన ప్రభుత్వం

తెలంగాణ ప్రభుత్వం మున్సిపాలిటీల పరిధిలో నిర్వహించిన ప్రత్యేక లైవ్నెస్ సర్వేలో మృతిచెందిన వారి పేరిట 24,000 మంది పెన్షన్లు పొందినట్లు గుర్తించింది. అనర్హులను తొలగించేందుకు చేపట్టిన ఈ డ్రైవ్ సోమవారంతో ముగిసింది. రాష్ట్రవ్యాప్తంగా మొత్తం 41.2 లక్షల మంది లబ్ధిదారులు ప్రభుత్వం నుంచి పింఛన్లు అందుకుంటున్నారు.

ఈ లైవ్నెస్ ప్రత్యేక డ్రైవ్ కింద మున్సిపాలిటీలలో 19.04 లక్షల మంది పెన్షన్దారుల వివరాలు సేకరించాలని లక్ష్యంగా పెట్టుకున్నారు. మే 15న ఈ కార్యక్రమం ప్రారంభమైంది. నిన్నటికి 15 లక్షల మందికిపైగా వెరిఫికేషన్ పూర్తయింది. మంచిర్యాల, బెల్లంపల్లి, జగిత్యాల జిల్లాల్లో 99% సర్వే పూర్తయింది. రంగారెడ్డి, మేడ్చల్, ఖమ్మం జిల్లాలు వెనుకబడ్డాయి. లబ్ధిదారులు ఇండ్లకు తాళాలు వేయడం, వలసలు, సాంకేతిక ఇబ్బందులు ఇందుకు కారణమని అధికారులు తెలిపారు.

చనిపోయిన వారి పెన్షన్లు తొలగించి, కొత్తగా దరఖాస్తు చేసుకున్న అర్హులకు ఆయా పెన్షన్లు కేటాయించనున్నారు. ఇప్పటికే 3,87,000 మంది వెరిఫికేషన్ బాకీ ఉంది. అర్హులెవరూ పెన్షన్ కోల్పోకుండా ఈ ప్రక్రియ కొనసాగించాలని అధికారులు ప్రణాళిక సిద్ధం చేశారు.

ఇక పెన్షన్ల పంపిణీలో మోసాలు అరికట్టేందుకు రాష్ట్ర ప్రభుత్వం పూర్తిగా ఆన్‌లైన్ విధానం తీసుకొస్తోంది. జగిత్యాల, పెద్దపల్లి, రాజన్న సిరిసిల్ల, భద్రాద్రి కొత్తగూడెం, ఖమ్మం, కరీంనగర్ జిల్లాల్లో పైలట్ ప్రాజెక్టుగా దీన్ని అమలు చేయనున్నారు. విజయవంతమైతే రాష్ట్రవ్యాప్తంగా విస్తరించాలన్నది ప్రభుత్వ ఉద్దేశం. ఇప్పటికే కొన్ని ప్రాంతాల్లో బ్యాంక్ మరియు పోస్టాఫీసు ద్వారా నేరుగా ఖాతాల్లో నగదు జమ అవుతోంది. సర్వేలో సాంకేతిక సమస్యలు ఉన్నా, రాష్ట్రంలోని ఉత్తర తెలంగాణ జిల్లాల్లో 95%కిపైగా జీవన్ ప్రమాణ సర్వే పూర్తయినట్లు అధికారులు తెలిపారు.