తెలంగాణ ఎమ్మెల్సీలు అద్దంకి దయాకర్, బల్మూరి వెంకట్‌లకు రాష్ట్ర మంత్రి హోదా

తెలంగాణ ప్రభుత్వం ఇద్దరు ఎమ్మెల్సీలకు రాష్ట్ర మంత్రి హోదా కల్పించింది. ప్రస్తుతం ప్రభుత్వ విప్‌లుగా ఉన్న అద్దంకి దయాకర్, బల్మూరి వెంకట్‌లకు ఈ హోదా లభించింది.

ఈ మేరకు అధికారిక ఉత్తర్వులు జారీ అయ్యాయి. మంత్రి హోదా కారణంగా ప్రభుత్వ ప్రోటోకాల్ పాటించాలని సంబంధిత శాఖలను ఆదేశించారు. ఏప్రిల్‌లో అప్పటి సీఎస్ రామకృష్ణరావు పేరిట ఈ ఫైల్ రూపొందింది, కానీ తాజాగా రాష్ట్ర ప్రభుత్వం దీనిని రిలీజ్ చేసింది.

అద్దంకి దయాకర్‌కు తెలంగాణ ఉద్యమంలో పాల్గొన్న చరిత్ర ఉంది. బల్మూరి వెంకట్ విద్యార్థి నాయకుడిగా నాటి కేసీఆర్ ప్రభుత్వాన్ని విమర్శిస్తూ పోరాటాలు చేశారు, జైలు శిక్ష కూడా అనుభవించారు.

వీరిద్దరి ఎమ్మెల్సీ పదవీకాలం పూర్తయ్యేంత వరకు మంత్రి హోదా అమల్లో ఉంటుందని ఉత్తర్వులు స్పష్టం చేశాయి. ఈ నిర్ణయంపై కాంగ్రెస్ పార్టీ కార్యకర్తలు సానుకూలంగా స్పందించారు.