సిర్పూర్ యువకుడి ఏఐ యాంటీ-మిస్సైల్ టెక్నాలజీ: అమెరికాలో పీహెచ్డీ, ప్రయోగాత్మక విజయం

సిర్పూర్ కాగజ్‌నగర్‌కు చెందిన యువ శాస్త్రవేత్త సాయి సంప్రీత్ ఏఐ ఆధారిత యాంటీ-మిస్సైల్ సాంకేతికతను రూపొందించారు. ఆయన అమెరికాలోని ఒక విశ్వవిద్యాలయంలో పీహెచ్డీ చేస్తూ ఈ ప్రయోగాత్మక పరిశోధన చేపట్టారు.

బీమ్‌ఫార్మింగ్, హై-పవర్ లేజర్లను ఉపయోగించి శత్రు మిస్సైల్స్‌ను గాల్లోనే ధ్వంసం చేసే ఈ టెక్నాలజీని ఆయన వివరించారు. ప్రస్తుతం భారత్‌లో 30 కిలోవాట్ల లేజర్ సామర్థ్యం మాత్రమే ఉందని, తన ఏఐ సిస్టమ్ వేగవంతమైన లెక్కలతో మెరుగైన ఫలితాలిస్తుందని సంప్రీత్ చెప్పారు. ఈ ప్రాజెక్టును అమెరికా ప్రభుత్వం నిధులతో చేశారు.

సంప్రీత్ తన పరిశోధనలో భాగంగా చౌకైన టెస్ట్-బెడ్ (పరీక్షా వేదిక) కూడా రూపొందించారు. సాధారణంగా 30 వేల డాలర్లు ఖర్చయ్యే ప్రయోగాన్ని కేవలం 3 వేల డాలర్లతోనే చేసి చూపించడం ద్వారా మిలిటరీ ప్రోటోటైపింగ్‌కు తక్కువ ఖర్చుతో కూడిన ప్రత్యామ్నాయాన్ని అందించారు.

హైదరాబాద్‌లోని వర్ధమాన్ కాలేజీలో ఇంజనీరింగ్ పూర్తి చేసిన సంప్రీత్, ఆపై అమెరికా వెళ్లి మాస్టర్స్, పీహెచ్డీ పూర్తి చేశారు. పీహెచ్డీ సమయంలో Amazon, Qualcomm వంటి సంస్థల్లో ఇంటర్న్‌షిప్ చేశారు. ప్రస్తుతం శాన్ డియాగోలోని ఓ కమ్యూనికేషన్ కంపెనీలో ఇంటర్న్‌గా పనిచేస్తున్నారు. ఆయన తల్లిదండ్రులు ప్రభుత్వ ఉపాధ్యాయులు.

భవిష్యత్తులో భారత్‌కు తిరిగి వచ్చి, డిఫెన్స్ రంగంలో స్టార్టప్ ప్రారంభించాలనే లక్ష్యంతో ఉన్నట్టు సంప్రీత్ తెలిపారు. దేశంలో మిలిటరీ టెక్నాలజీ అభివృద్ధికి తన వంతు కృషి చేయాలని ఆయన భావిస్తున్నారు.