తెలంగాణలో 2,162 గ్రామీణ హ్యామ్ రోడ్ల నిర్మాణానికి గ్రీన్ సిగ్నల్, ₹6,294 కోట్ల వ్యయం

తెలంగాణ ప్రభుత్వం గ్రామీణ ప్రాంతాల్లో హ్యామ్ రోడ్ల నిర్మాణానికి ఆమోదం తెలిపింది. రాష్ట్రంలోని అన్ని జిల్లాల పరిధిలో ఈ పనులు జూలై నెలాఖరు నుంచి ప్రారంభం కానున్నాయి.

పంచాయతీరాజ్ గ్రామీణ అభివృద్ధి శాఖ ప్రభుత్వానికి సమర్పించిన నివేదిక ప్రకారం, హ్యామ్ విధానం కింద 2,162 రోడ్ల నిర్మాణం చేపట్టనున్నారు. ఈ రోడ్ల మొత్తం పొడవు 7,449.50 కిలోమీటర్లు కాగా, వ్యయం ₹6,294.81 కోట్లుగా నిర్ణయించారు.

పనులను 17 ప్యాకేజీలుగా విభజించి టెండర్లు పిలిచారు. ఇప్పటికే 14 ప్యాకేజీలకు టెండర్లు పూర్తయి గుత్తేదారు సంస్థలకు అనుమతులు జారీ చేశారు. మరో ప్యాకేజీ అనుమతి దశలో ఉంది. మిగిలిన రెండు ప్యాకేజీలకు జూలై 2న టెండర్ల ప్రక్రియ ముగుస్తుంది. ఆ వెంటనే రాష్ట్రవ్యాప్తంగా ఒకేసారి నిర్మాణ పనులు ప్రారంభిస్తారు.

టెండర్లు పొందిన సంస్థలు 30 నెలల్లో నిర్మాణం పూర్తి చేయాలి. తర్వాత 15 ఏళ్ల పాటు రోడ్ల నిర్వహణ చేపట్టాలి. నిర్మాణ కాలంలో ప్రాజెక్టు వ్యయంలో 40% మొత్తాన్ని ప్రభుత్వం చెల్లిస్తుంది. మిగిలిన 60% నిర్వహణ కాలంలో ప్రతి ఆరు నెలలకు ఒకసారి చెల్లింపులు చేస్తారు. ఈ చెల్లింపుల్లో ధరల పెరుగుదల, వడ్డీ, ఇతర ఖర్చులు కూడా చేర్చుతారు.