పార్టీ ఫిరాయింపు ఎమ్మెల్యేల కేసు: కౌంటర్ అఫిడవిట్లకు చివరి అవకాశం, తదుపరి విచారణ జూలై 22కు

తెలంగాణ హైకోర్టు బీఆర్ఎస్ నుంచి కాంగ్రెస్ లోకి చేరిన ఎమ్మెల్యేలపై దాఖలైన అనర్హత పిటిషన్ల కేసులో కీలక ఆదేశాలు జారీ చేసింది. కౌంటర్ అఫిడవిట్లు దాఖలు చేయని ఎమ్మెల్యేలపై కోర్టు అసహనం వ్యక్తం చేసింది. ఇప్పటికే అనేక వాయిదాలు ఇచ్చినా కౌంటర్లు దాఖలు చేయలేదని చీఫ్ జస్టిస్ నేతృత్వంలోని ధర్మాసనం ప్రశ్నించింది.

స్పీకర్ తన అధికారాలను ఉపయోగించి వీరి అనర్హతను తోసిపుచ్చిన నిర్ణయాన్ని సవాలు చేస్తూ బీఆర్ఎస్ ఎమ్మెల్యేలు జి. జగదీశ్ రెడ్డి, కే.పి. వివేకానంద, కే. సంజయ్, పల్ల రాజేశ్వర్ రెడ్డి, సి.హెచ్. ప్రభాకర్, పాడి కౌశిక్ రెడ్డి పిటిషన్లు వేశారు. ప్రతివాది ఎమ్మెల్యేల్లో దానం నాగేందర్, బండ్ల కృష్ణమోహన్ రెడ్డి మినహా మిగిలిన వారు కౌంటర్లు దాఖలు చేసినట్టు పిటిషనర్ల న్యాయవాది తెలిపారు.

కౌంటర్లు దాఖలు చేయని ఇద్దరి తరపు న్యాయవాదులు మరో వారం గడువు కోరగా, కోర్టు వారికి చివరి అవకాశం ఇస్తూ రెండు వారాల్లోగా కౌంటర్లు సమర్పించాలని ఆదేశించింది. ఆ తర్వాత పిటిషనర్లు వారం రోజుల్లో రిప్లై కౌంటర్లు, మూడు వారాల్లోగా ఇరుపక్షాలు రాతపూర్వక వాదనలు సమర్పించాలని సూచించింది. తదుపరి విచారణను జూలై 22కు వాయిదా వేసింది.